Bethlehem Vengthlang hnehin Khatla South-in champion zawn thei turin hma lam an pan a, Nilainiah Kanan leh Bungkawnin Thanpari Pautu Inter Branch YMA basketball quarterfinal an paltlang bawk.

Hawla Indoor Stadium, Republic Vengthlangah Khatla South-in quarter hnihna leh hnuhnung ber an awp bet a, quarterfinal hmasa berah 95-84-in Bethlehem Vengthlang an hneh a ni.

Central YMA leh Mizoram Basketball Association-in YMA branch hrang hrang basketball inelna a buatsaih hnuhnun ber, kum 2018 khan Khatla South an champion a, Chhinga Veng branch YMA-in kum 60 an tlin lawmna tournament kal mekah YMA branch 72 an tel a, champion turin khelh hnih chak zawn chiah an mamawh tawh a ni.

Bethlehem Vengthlang hmaah Hmachhuana’n point 30 thawk chhuakin Khatla South a chakpui a, quarter hnihnaah point riat khungin 26-13-in an sang zawk a, chawlhlawk an hman rualin point 12-in hma an hruai a ni.

Bethlehem Vengthlang tan Steven-a’n point 31 hmuin quarter thumna a zawh rualin 69-67-in an hniam a, an inthlauhna point hnih chauh ni hman mah se quarter hnuhnung berah Hmachhuana’n point 10 khungin 27-17-in Khatla South an sang zawk a, an chak theih nan Rinzuala’n point 16 vawm lut bawkin quarter hnihna leh linaah point ruk ve ve a thawh a ni.

Kananin quarter hnuhnung pahnihah an dinhmun siamin 80-70-in Tuikhuahtlang an hneh a, Inrinni tlai dar 5-ah Khatla South nen semifinal an khel ang.

Rozama’n point hnih thunin quarter thumna a tawp rualin 54-52-in Kananin hma an hruai let a, hawi kir tawh lovin quarter hnuhnung berah Nuna’n point 12 hmuin 26-18-in Tuikhuahtlang aiin an sang a, a tawpah phu takin an chak.

Quarter hnihnaah Tuikhuahtlang thiampuipa, Lalrina’n point 11 thunin chawlhlawk thlengin point rukin an sang a; mahse, second half atangin an tla hniam a, lehlam veng hneh lova ho taka ball chhuah fo bakah a tir lam angin vawm luh an harsat a, a tawp thlengin Kanan an hnaih zo tawh lo.

Nursery Veng hnehtu, Bungkawnin a tir lamah khel tha tawk lo mah se hun laihawlah chungnung takin an inlan a, 78-69-in an chak.

Thazuala’n team fuih phurin quarter hnihna leh thumnaah 23-17, 26-15-in Bungkawn an sang zawn a, point 16-a hniam chungin Nursery-in quarter hnuhnung ber an khel a, nawr viau mah se chak tur khawpin an kir leh zo tawh lo a ni.

Bungkawnin Inrinni zan dar 8-ah semifinal an khel dawn a, Ramhlun North leh Zarkawt chak zawk an hmachhawn ang. 

Anni pahnih hian Nilaini zan dar 8 hian quarterfinal hnuhnung ber an khel dawn a, LPS 13 HD channel leh LPS YouTube channel-ah final thlengin inkhel hi live-a pek chhuah vek tur a ni.