Aizawl June 16, 2024 : Nimin, June 15, 2024 kha Mizorama tlawmngai pawl lian ber, Young Mizo Association (YMA) din champha vawi 89-na, YMA Day a ni a, hmun hrang hrangah hlim taka hman a ni a. Branch tam tak chuan zingkarah faina hnatlang neiin tanpui ngaite tanpui hna an thawk a, chhun lamah intihhlimna leh infuihtharna hun an hmang a, zan lama hun hmang an awm bawk.

YMA hi June 15, 1935 khan Young Lushai Association tih hming vuahin din a ni a. Hruaitu hmasate chu President Rev. Lewis Evans (Pu Niara), Vice President Miss Katie Hughs (Pi Zaii), Secretaries Pu Pasena & Pu Vankhuma leh Treasurer Rev. David Edwards (Zorama Pa) te an ni a. YLA tih hi kum 1947 khan YMA tia thlak a ni a, vawiin a la pu zui ta a ni.

Tun dinhmunah YMA hian branch 821 a nei a, group awm zat -50, Sub. Hqrs. pariat, member 4,90,601 niin mipa 2,86,858 leh hmeichhia 2,03,743 an awm a. Mizoram chhunga branch awm zat hi 767 niin Mizoram pawnah branch 54 a awm bawk a. Aizawl khawpui chhungah branch 109 a awm bawk.

Central YMA chuan YMA Day vawi 89-na pual hian damdawi in leh home hrang hrangah chibai bukna an hlan kual a. Aizawl leh a chhehvela sawrkar leh Kohhran damdawi in ah Rs.15,000/- theuh an hlan a, TBCC, Sakawrtuichhun-ah buhfai bag 100 an pe a. TNT, Zuangtui-ah buhfai bag 50 pein OKM Home, Phunchawngah buhfai bag 25 an pe a. Heng bakah hian India ram chhunga state hrang hranga Mizo Welfare 16 hnenah Rs.15,000/- theuh an hlan bawk.