ZALEN September 01, 2026 : YMA Sub Hqtrs Lunglei chuan Ramdinpuii thattua puh, Denghmingthanga, Lunglei Police Station atanga tlan chhuak chu YMA Branch tin ten mahni huam chhungah mit lêna, Police te thawhpui a, hmu an awm a nih pawhin kut thlak lo turin an ngen.

YMA Sub Hqtrs Lunglei chuan vawiin khan thuchhuah siamin Mualthuam 'N' tleirawl, H. Ramdinpuii thattu-a puh, Denghmingthanga kum 20 chu tukin zing dar 1:00 vel- khan Lunglei police station-a thu zawh fiah tura kawl a nih laiin a tlan chhuak tih an sawi a.

Police-ten hmalakpui tura an ngen angin, YMA Sub-Headquarters, Lunglei hnuaia branch te, a zawn chhuah kawngah, mahni huam chhungah theuh mit len a, police-te thawhpui turin an inngen tih an sawi a, hmu kan lo awm a nih pawhin kut thlak lo turin kan inngen a ni an ti.

Denghmingthanga hian thlalak tarlana a thuamhnaw hi, a tlan chhuah laiin a ha a, pheikhawk bun lovin, handcuff vuah chungin a tlan chhuak tih sawiin, a chin hria chuan Lunglei Police Station - Mb. No. 9485414441 ah emaw, YMA hruaitute hnenah hriattir turin an ngen tih an sawi.