ZALEN Oct. 2, 2025; Hlimen branch YMA-in anmahni senso in hmeithai chenna in an sak sak a, vawiin tlai-ah hawn a ni ang.

Hlimen branch YMA hruaitute hnen atanga ZALEN thudawn danin, an venga hmeithai Zodinpuii chenna in chu tun hnai khan a tlu sawp a, hei hi YMA in an mawhah la in, a chenna in tur hi an sak sak a ni.

In sakna atan hian YMA-in sum an neih sa an hman bakah, mi inphal thenkhatte hnen atangin thilpek an dawng a, heng bakah hian an bialtu, Aizawl South III MLA, Baryl Vanneihsangin in chung tur rangva a tum a, an bialtu corporator Dr. C Malsawmtluangin a bang tur tile a tum bawk.

He in sak hna hi September ni 13, 2024 khan an tan a, luah theiha peihfel ni tawhin, vawiin tlai dar 4 ah an bialtu MLA-in a hawng ang.