Aizawl: Sub Headquarters YMA, Serchhip hruaitute chuan an huam chhunga kawng laih hna thawktute chuan hna thawh zo tha lova an hawsan mai an hlauh thu an sawi.

Zirtawpni khan Sub headquarters YMA, Serchhip leh PWD Serchhip division chuan PMGSY kawng laih hi enin, hnathawh zawh tawh siam that (repair) ngai a awm tih an hmu a. Fur ruahtui sur zawh hnuah kawng chhuat alkatra luan that ngai siam tha leh se, kawngba hnim chu August thla chawhma lam hian sam fai zui nghal se tiin hnathawktu (contractor)-te an hrilh nghal a ni. 

YMA Sub hqrs, Serchhip hi an President Kawlthuama leh OB dang pathumte bakah Vigilance leh Media & Documentation Committee hruaitute an ni a. PWD lam hi Serchhip Division EE Zirsangliana chuan a ho a ni.

YMA hruaitute chuan kawng siam zawh thuai aiin hna tha an mamawh thu an sawi a. PWD hotute chuan helaia PMGSY hnathawh chu a chhe lutuk lo nain, tha taka enkawl zui a ngai nia an hriat thu an sawi a. Contractor-te chu  tih tur an ti lo emaw, an hnathawh a chhe lutuk emaw a nih chuan nakin zelah pawh a hna thawk zui thei lova siam (terminate) theih an nih thu te an sawi a ni.