Aizawl: October ni 20-22,2015 inkara YMA General Conference vawi 70-na, Bairabi a neih turah pandal ‘Zofate Run’ sak hna thawh tan a ni. Zirtawpni khan YMA General Conference 2015 Organizing Committee Chairman P.C. Zoram Sangliana MLA chuan Bairabi tlawhin inbuatsaihna hrang hrang kalpui mek leh hmachhawp neihte Organizing Committee te nen an thlir ho. Bairabi Playground-a Pandal ‘Zofate Run’ sak mek hi a dung ft. 200 leh a vang ft.120 a ni a, hemi bakah hian stage (ft.70x50) sak a ni dawn bawk a. Pandal hi palai 8000 vel thleng thei tura buatsaih a ni dawn a. Chakkeshwari Bandhar Tent House, Silchar ten October ni 1 atang khan Pandal hi an sa tan a, Pandal sak leh a chei hna chu October ni 17-ah zawh hman vek tum a ni.Playground ah hian Conference chhung atan office leh hmun pawimawh atana hman tur leh Mizo kutchhuak te phochhuahna tur stall 5 YMA member te hian hnatlang neiin an sa mek. YMA General Conference ah hian Chief Minister Lal Thanhawla chu khuallian a ni dawn a, kumin hian Central YMA hruaitu thar thlanna neih a ni dawn bawk a ni.