ZALEN Dec. 11, 2025: Nizan (11.12.25) dar 8.30 khan kum 2025-2027 chhunga YMA kumpuan “ Ruihhlo Do” chu Vanapa Hall ah Central YMA President, R Lalngheta’n a hawng. 

Kumpuan hawnna inkhawm hi Prof. Lalnuntluanga, Vice President in a kaihruai a, Er. H Duhkima Treasurer in hunserh a hmang. 

Prof. Malsawmliana, General Secretary in inhmelhriattirna hun hmangin kumpuan chungchang inhriattirna hun a hmang. 

R Lalngheta, President in thusawiin, “Zanin atangin khawlai a kan unaute thle mai mai riahna tur tha neilo te, CYMA kumpuan ten hma la tanin TBCC ah dah thlak tan leh a ni ang," a ti. Ruihlo do hi a sawt tih a takin ka hria, Pafa in be thei tawhlo ten, in ngai tak a an han awmho/inkawm leh te hmuh hian a hlawhtlin zia kan hmu, ruihhlo ngai te diriamlo in, an tan a tha turin YMA hruaitute, ruihlo ngaite chhanchhuak turin kan puanven i sawi chhing i la, fimkhur tak leh diktakin ruihhlo i do tlang ang u. Dan chung a leng kan nilo tih erawh hre thar ila. Diktak leh huaitakin ruihhlo i do ang u, ruihlo kan do hi kan thawk thlawn lo. A la tivelo ten an tihloh nan, inzirtirna tam zawk kan neih a ngai.

“Zaninah hian ruihhlo zuarte ka chah duh chu, mi chhungkua nasa takin in tibuai a. Zanin atang hian inruihhlo zawrh lo sim tur leh eizawnna dang lo ngaihtuah tur in ka chah che u a, zanin a lokalkhawm te pawh awm mai mai thei kan ni lo", tiin, theihtawp chhuah a ruihhlo do turin kal khawm te a chah a. Ruihhlo do kumpuan a hawng nghal a ni

Kumpuan hawnna inkhawmah hian Central YLA hruaitute sawm an nih angin JH Lalrindika, General Secretary in thutawi a sawi. 

He hunah hian Central YMA chuan ruihhlo ngaite enkawlna neitu, Lalruatpuii, Founder Operation Kingdom Ministry (OKM) leh TT Zohmingthanga, Tawngtai Bethel Camping Centre (TBCC) te hnenah chawimawina Thuziak an hlan. 

Lalsangliana (Taitea), Youth Icon hnenah mipuite ruihhlo that lohna zirtir kawnga hma la tura “Palai” (Ambassador) a ruatna an hlan.