Aizawl: Nimin chhun khan YMA Mission Veng Branch chuan YMA Day puala, ‘Luanchhuah Programme’ an lo duan tawh bawhzuiin an Branch huam chhung, Mission Veng Inrinni Bazar-a chawhmeh leh thil zuarte chhun eitur sawhchiar an sem. YMA hian mi 500 vel hnenah eitur an pe a ni. YMA Mission Veng Branch hian kar hmasa Inrinni khan YMA Day pual Luanchhuah Programme ah thisen pek runpui an lo nei tawh bawk a. Kum 2017 hi Luanchhuah Kum-ah neiin mi harsa leh thingtlang lama YMA Branch harsa zawkte chu sum fai leh bungrua hmanga tanpuina turin an Branch sum lakluh atanga sawma pakhat an dah hrang a, he mi hmang hian Khuangphah Branch leh Ngunling Branch te chu bungrua chi hrang hrang leh PA System tha tak an lo lei sak tawh a ni.