ZALEN, Dec. 01, 2024: Mizo rawltharte chuan Youth National Basketball Championship-ah Goa leh Bihar hneh thei mah se inelna sang zawk, Level 1 an kai zo ta lo.

West Bengal Basketball Association (WBBA)-in an thlen mek, Basketball Federation of India (BFI) buatsaih, 39th Youth National Basketball Championship (Men & Women)-ah Pathianni tuk khan Mizoram mipa team chuan Bihar an hneh.

Mizo rawltharte hi Bihar lakah hian 46-37-in hnehna an chang a, a hmain Goa chu 45-22-in an lo sawp tawh bawk.

WBBA Ground bakah Howrah-a Damurjala Indoor Stadium-a inelna kalpui mekah Mizoram hi Level 2 Group C-ah Goa leh Bihar bakah Puducherry leh Delhi an awmpui bawk.

Inrinni tuk khan Puducherry lakah 51-64-in an tlawm a, tlai lamah Delhi lakah 25-63 zetin an tlawm bawk a. Group stage-ah khelh li-ah vawi hnih ve ve chak leh tlawm an nei a, 3-na niin Level 1 an kai phak ta lo a ni.

Mizoram team enkawltute chuan an khelh hmasak bera Goa an hneh hnuah khan an hmabak pathum chu hneh zawh an inbeisei chiah lo tih ZALEN an lo hrilh tawh a. “Thiamna lamah chuan kan huphurh bik lo va, pumruaah kan khan lo va, kan insan hleih em a ni,” an ti.

Delhi lakah an tlawm hnuah pawh an sawi lawk ang chiahin, “An lian em a ni,” an ti a. Thiam thilah an naute nep bik lo mah se pumruaah an phak ngang lo niin an sawi.

Kum 16 hnuai lam tana buatsaih championship kal mekah hian state/union territory 28 an tel a. Group parukah inthenin Mizoram hian Level 1 (Group A & B) kai phak lo mah se group dang atanga kai sang zo ve lo dangte nen an la inkhel leh dawn a ni.

Mizoram team hi player 12 leh anmahni hruaitu pathum an ni a. Inelna hi Zirtawpni atanga tanin Ningani thleng awh tur a ni a, Mizoram team hi Zirtawpnia haw turin an inruahman.