ZALEN, Nov. 27, 2024: Basketball Federation of India (BFI) buatsaih 39th Youth National Basketball Championship (Men & Women) khel turin Mizoram mipa team chuan Nilaini khan West Bengal an pan.

Championship hi kum 16 hnuai lam inelna tur a ni a, Zirtawpni atanga khelh tan tur niin karleh Ningani thleng a awh dawn a. Mizoram team-ah hian player 12 leh anmahni hruaitu pathum an awm.

West Bengal-in Kolkata-a West Bengal Basketball Association (WBBA) Ground leh Howrah-a Damurjala Indoor Stadium-a inelna a thlen turah hian state/union territory 29 an tel dawn a. Mizoram hi Group C-ah Bihar, Delhi, Goa leh Puducherry te nen an awm ho a ni.

Mizoram team hi coach KC Lalliantluanga, asst coach LT Thansanga leh manager Richard Lalduhsanga ten an hruai a ni.

Mizoram squad: Francis Lalnunkima, Bungkawn; John Lalremruata, Falkland Veng; Lalawmpuia Rokhum, Tuikual South; Ricky C.Lalrinmawia, ITI; Marcus Lalnunzira, Vaivakawn; Enos Vanlalhriata, Republic; Rosangkima, Khatla; J.Lalrinpuia, Tuikual South; Laldintluanga, Mission Vengthlang; R.Vanlalnunpuia, Mission Vengthlang; Joshua C.Lalnundika, Nursery Veng leh Malsawmtluanga, Bungkawn Vengthar.