YouTube-in subscriber maktaduai khat nei tlingte hnena an pek thin 'Gold Play Button' chu Mizo zinga a hmasa ber ni turin ZORIMAWI Youtube Channel chuan an dawng ta rup mai. ZORIMAWI hian March thla tir lam khan subsciber maktaduai khat an nei tling a, hei hi Mizo zinga a hmasa ber leh awm chhun a la ni rih. 

YouTube-ah hian subscriber neih hnem dan a zirin Play Button hrang hrang a awm a, a hniam ber Silver Play Button dawng tur pawhin subscriber 100,000 (nuai khat) tal neih a ngai. Silver Button hi chu Mizo zingah pawh dawng an awm ve nual tawh a, Gold Button dawng phak erawh ZORIMAWI chauh hi an ni. 

Gold Play Button dawng tur hian subscriber maktaduai khat neih tlin a ngai a, Mizo mipui hi maktaduai khat chuang awrh chauh kan la nih avangin dawn phak a harsa hle ang tih a rinawm. Mitin hian phone nei vek pawh ni ila thil harsa tur tak a ni a, chutih laiin heti zat subscriber nei thei hi an awm tlat lawi si - khawvel hmun hrang hranga Zohnahthlak unaute pawhin tha an thawh hlawk viau tihna a ni thei bawk.  

Diamond Play Button dawng tur phei chuan subscriber maktaduai 10 tal neih tlin a ngai a, hei hi chu Mizoram atang chuan thil theih loh tlukah a ngaih theih rih awm e. Red Diamond Play Button phei chu subsciber maktaduai 100 tal neih a ngai - khawvel huap pawhin channel panga chauhin an la dawng. Chungte chu - PewDiePie, T-Series, Cocomelon, SET India leh Mr. Beast te an ni. 

YouTube Play Button hrang hrang te : 
~ Silver Play Button (100,000 subscribers)
~ Gold Play Button (1 million subscribers)
~ Diamond Play Button (10 million subscribers)
~ Red Diamond Play Button (100 million subscribers)