Tunlai khawvelah chuan TV aiin YouTube kan en nasa tawh zawk a, hei hian khawvel tharah min chuan kai tir mek. YouTube khawvelah kan cheng mek a, engkim awlsam taka hmehchhuah theih vek a nih tawh avangin chhuah hun bi nei TV ai chuan; duh huna kan duh zawng en mai theihna YouTube hian khawvel mipui suk thlek a hruai thui tawh zawk a tih theih awm e. 

Tun dinhmunah khawvela subscriber ngah ber chu T-Series an ni a, India-in khawvelah ber nihna kan hauh tihna a nih chu. He thu ziah lai hian T-Series hian subscriber maktaduai 263 an nei mek a, Mizoram mihring zat maktaduai khat chuang awrh atanga chhut phei chuan tam turu hem hem tak a ni. T-Series hi MrBeast chuan a hnaih ber a, subscriber maktaduai 250 a nei. An inthlauhna hi maktaduai 13 zet a la ni a, India-in hun eng emaw tichhung chu ro kan rel rih dawn niin a lang. Top 5-ah hian SET India pawh langin, subscriber maktaduai 171 an an nei mek a ni. 

CocoMelon chu subscriber ngah pathumna niin, Kids Diana Show pawh top 5-ah an lang. Vlad and Niki, Like Nastya, PewDiePie, Zee Music Company leh WWE te chu subscriber ngah zual top 10-ah an lang bawk - music, entertainment leh nursery rhymes channel te an hit hle. 

T-Series

T-Series hi record label niin, Hindi film soundtrack leh Indi-pop music an tichhuak nasa hle. Mihring tamna India chhulchhuak niin, subscriber pawh an ngah rem rem hle. 

India rama record label leh film studio lian ber niin, an hlutna pawh sang vet vet tak a ni. T-Series hian - music video, lyric video, remix leh film trailer te an post thin a, Bollywood industry-ah pawh huhang an nei lian hle. 

T-Series YouTube channel hi 2006 atanga bultan kha niin, video hi 20,690 an upload tawh - viewer an nei tawh zawng zawng hi 

251,614,184,672 zet a tling a ni! Video mala viewer an ngah ber hian entu mi tluklehdingawn 1.5 chuang zet a nei bawk. 

MrBeast a ropui

YouTuber sawi tawh chuan rilruah MrBeast a lang nghal thin - subsciber ngah ber ni lo mah se YouTuber lar ber erawh a ni chiang e. Kum 25 mi American YouTuber hi a hming tak chu James Stephen 'Jimmy' Donaldson a ni a, MrBeast tia hriat lar a ni thung. 

A channel hi 2012 atanga bul a tan kha niin, video 786 videos chauh la upload mah se, viewer 46,394,524,820 zet a nei tawh thung. 

MrBeast hi midangte tana luangchhuak thin, thilpek pek a uar em avanga 'giveaway king' ti hiala an koh thin a ni. Kum khata a sum lakluh zat hi US dollar maktaduai 550 zet a tling a, atan chuan eizawnna dang reng a ngai awm lo e! A sum lakluhte hi a hmangchhuak nasa hle a, a hausa lutuk lo ni ten an sawi hial. Giveaway atan US dollar mtd 2.5 man zet te pawh a lo pe chhuak tawh a ni - pian phunga rualbanlo ke bulte tan dollar mtd 5 chuag a pek bakah, mi harsa zawkte tan dollar mtd eng emaw zat a pe chhuak tawh bawk. 

MrBeast hian tun hnai khan reality game show ropui tak a buatsaih tur thu a lo puang tawh bawk a, Prime Video te nen an thawkho dawn a ni. He 'Beast Games' show atana a sum theh chhuah tur pawh hi dollar mtd. 5 ze a tling dawn a, show ropui ber chhawpchhuah a tum thu a lo sawi chhuak tawh a ni. 

MrBeast hi tin dinhmunah mimala YouTube subscriber ngah ber a ni bawk. 

YouTube-a subscriber ngah zual top 10 

1. T-Series – India – mtd. 263 

2. MrBeast – United States – mtd. 250 

3. CocoMelon – United States – mtd. 173 

4. SET India – India – mtd. 171

5. Kids Diana Show – Ukraine/United States – mtd. 121

6. Vlad and Niki – Russia – mtd. 116 

7. Like Nastya – Russia/United States – mtd. 114 

8. PewDiePie – Sweden – mtd. 111 

9. Zee Music Company – India – mtd. 106 

10. WWE – United States – mtd. 100 

Eizawn nan a tlak em?

A chhanna chu 'aw' tih hi a ni! Mizo zingah YouTube atanga sum la lut, eizawn nana hmang sawi tur eng emaw zat an awm tawh. Zohnahthakte hi ka tam lo a, mahse social media active kan thathnem avangin tunah chuan eizawnna tlak a tling tawh. 

Mizo zingah Zorimawi channel chu subscriber maktaduai khat nei tling hmasa ber leh awm chhun an ni mek a, kum 2023 khan maktaduai khat hi an kai a ni. Zorimawi YouTube channel-ah hian hla chi hrang hrang upload niin, Lalchhanchhuaha leh Zualbawihi ten 'Don't Cry Joni' an cover phei chu mi maktaduai 76 zetin an an view hem mai!

Mizo YouTuber zingah subscriber nuai chuang nei eng emaw zat an awm tawh a, an thla khat lakluh pawh officer tam tak aia sangte pawh sawi tur an awm nual tawh hial mai thei. Miin an hawhtlinpui tih avanga zuam ve ngawt chi erawh a ni lo, content nei tha leh rim taka thawk reng peih tan lo chuan hlawhtlinna a awm chuang lo tih hriat a tha awm e.