MrBeast chuan kum 10 dawn mimal zinga YouTube subscriber ngah ber dinhmun lo luah tawhtu PewDiePie chu a rawn khum ta tlat mai le. MrBeast hian tun hnai khan subscriber maktaduai 112 a rawn nei tling a, makatduai 111 nei mek PewDiePie a rawn khum ta a ni. 

YouTuber ten  ngaihven an hlawh chho zel a, tunah chuan milar sa tliah mai an ni tawh lo - sum leh pai pawh an lalut hnem rem rem hle. Swedish creator PewDiePie pawh hi a lar bakah a hausa hle a, mi thil tithei berte zinga mi a ni der tawh. A hming tak chu Felix Kjellberg a ni a, August 2013 khan mimal zinga YouTube-a subscriber ngah ber a ni tan. 

Kum 2019 khan mimal subsciber maktaduai 100 nei tling thei hmasa ber record a siam a, tunah erawh amah khumtu a rawn awm ta tlat mai. A hming chu Jimmy Donaldson a ni a, a channel hi MrBeast a ni. Jimmy Donaldson hian subscriber maktaduai 112 a rawn nei hem mai a, kum eng emaw zat lal ang maia lo khawsa tawh PewDiePie a rawn paihthla ta a ni. 

An inthlauhna hi a number chuan a inhnaih hle mai a, mahse maktaduai a ni tih erawh hriat tel a tha - Mizo zingah subscriber maktaduai khat nei tling pawh an la awm lo a nia! MrBeast hian giveaway, prizes leh charity work lam a tinasa a, a channel hian ngaihhlut pawh a hlawh hle a ni. 

YouTuber Mark Rober nen international collaborative fundraiser - TeamSeas leh TeamTrees an din a, environmental humhimna lamah nasa takin hma an la. Khawvel hmun hrang hrang atangin thingphun nan $mtd 24 zet an khawn khawm thei nghe nghe a ni. PewDiePie pawh hian TeamTrees project atan hian $70,000 a donate ve nghe nghe bawk. 

Hetih lai hian YouTube channel hrim hrima subscriber ngah ber chu T-Series an ni a, subscriber maktaduai 229 zet an nei! Indian music video publishing company T-Series te hi an sang fal nalh a, subscriber maktaduai 150 nei tling dang pawh an awm lo! Mimala subscriber ngah ber pahnih MrBeast leh PewDiePie te hian palina leh pangana an hauh phak a ni.