Kum 24 mi chauh a la ni a, mahse tunah chuan khawvela YouTuber hlawhtling ber tia chhal ngam a ni ta. American YouTuber Jimmy Donaldson hi MrBeast YouTube channel neitu a ni a, subsciber maktaduai 112 zet a nei hem mai! Kum 2021 chhung khan YouTuber zinga sum lalut hnem ber a ni bawk - a ropuina hi sawi nep chi rual a ni lo.  

PewDiePie kiang rawh le! 
Kum 33 mi PewDiePie hi khawvela YouTuber lar ber zinga mi a ni a, kum 10 dawn chu subsciber ngah ber dinhmun a luah nghe nghe. Swedish YouTuber hi mi tam tak chuan YouTube lal pa 'King of YouTube' ang hialah an chhal - a awm lo hran lo e. Mahse thil a danglam ve zela tunah chuan amah aia ropui a rawn inlar ta tlat mai. 
Amah hnaihtu ni chho char char MrBeast a rawn langsang chho zel a, tunah chuan PewDiePie meuh pawhin a lal thuthleng ken mai loh chu tih theih a nei ta lo. PewDiePie hian kum 10 dawn chu mimal zinga YouTube subscriber ngah ber dinhmun a luah hman a, tunah hian subscriber maktaduai 111 a nei mek. 
Swedish creator hi a lar bakah a hausa hle a, mi thil tithei berte zinga mi a ni. A hming tak chu Felix Kjellberg a ni a, August 2013 khan mimal zinga YouTube-a subscriber ngah ber a ni tan. 

Kum 2019 khan mimal subsciber maktaduai 100 nei tling thei hmasa ber record a siam a, thangkhat lian dawn hnuah amah khum thei an rawn awm ve ta chauh a ni. 

Hei le MrBeast chu...
MrBeast hian subscriber maktaduai 112 a rawn nei hem mai a, kum eng emaw zat lal ang maia lo khawsa tawh PewDiePie a rawn paihthla ta a ni. 

An inthlauhna hi a number chuan a inhnaih hle mai a, mahse maktaduai kar dan a ni tih erawh hriat tel a tha - Mizo zingah subscriber maktaduai khat nei tling em pawh an la awm lo a nia!
Tun hnai khan subscriber maktaduai 112 hi a rawn nei tling a, makatduai 111 nei mek PewDiePie a rawn khum thei hi a ropuina chu a ni. Kum 2012 khan YouTube channel hi a create a, a video hmasa ber chu minecraft a ni daih thung. Kum 10 kal taa a video upload hi tun thlengin mi maktaduai 13 velin an en tawh a ni.  
MrBeast hian video 800 vel chauh a la upload a, heti chunga heti zat subscriber a nei thei hi a ropuina belhchhahtu chu a ni. A video tin hian viewer maktaduai chuang a nei deuh vek a, ngaihhlut a hlawh hlawm hle. 
Thla 11 liam taa a video upload '$456,000 Squid Game In Real Life!' phei chu mi maktaduai 300 chuangin an en hem mai. A video hrang hrang atanga viewer a neih tawh zat belhkhawm hi tluklehdingawn 18 chuang zet a tling tawh a ni! Khawvela mihring awm zawng zawng zat hi tluklehdingawn 8 vel a ni a, khawvel mihring awm zat let ai pawhin a viewer neih zat hi a tam zawk tihna a nih chu. 
MrBeast hian giveaway, prizes leh charity work lam a ti nasa a, a channel hian ngaihhlut pawh a hlawh hle a ni. 

YouTuber Mark Rober nen international collaborative fundraiser - TeamSeas leh TeamTrees an din a, environmental humhimna lamah nasa takin hma an la. 
Khawvel hmun hrang hrang atangin thingphun nan $mtd 24 zet an khawn khawm. PewDiePie pawh hian TeamTrees project atan hian $70,000 a donate ve nghe nghe bawk. 

A channel dang...
American YouTuber Jimmy Donaldson hi pa pui tak chu a ni ve hrim hrim - MrBeast chauh hi a enkawl lo a, channel dang pali a nei cheu mai. A channel dang pali - Beast Philanthropy, MrBeast Gaming, Beast Reacts leh MrBeast 2 te pawh hi a hit hlawm hle a, subscriber pawh maktaduai 10 chuang a nei tling vek!
Beast Philanthropy hi mi maktaduai 10.6 chuangin an subscribe a, gaming lama a insawrbingna MrBeast Gaming pawhin subsciber maktaduai 29.5 zet a nei. Beast Reacts pawh mi maktaduai 20.2 zetin an subscribe a, MrBeast 2 pawh maktaduai 16.7 laiin an subsciber bawk. 

A sum lakluh a turu!
YouTuber ten  ngaihven an hlawh chhoh zelna khawvelah kan cheng a, tunah chuan milar sa tliah mai an ni tawh lo - sum leh pai pawh an lalut hnem rem rem hle. Jimmy Donaldson hi nikum 2021 chhung khan YouTuber zinga sum lalut hnem ber a ni a, $mtd 54 zet lalut anga chhut a ni. YouTuber te sum lakluh zat hi a chiah chiah a ni lo ang tih a rin theih a, an lakluh zat tarlan pawh hi a inang lo fur a ni. 
MrBeast hian kum 2020 kha chuan $mtd 29.5 vel a lalut anga chhut a ni a, nasa takin a sum lakluh hi a pung tihna a ni - kumin chhunga a sum lakluh zat pawh hi a pun chhoh leh ngei a rinawm. 
Kum 2021 khan Jake Paul chu sum lalut hnem pahnihna a ni a, a sum lakluh zat chu $mtd 45 a ni. Markiplier chuan $mtd 38 an lalut a, Rhett & Link chennel chuan $mtd 30 an lalut ve bawk. 
Unspeakable, Like Nastya, Ryan’s World, Dude Perfect, Logan Paul leh Preston te chu sum lalut hnem zual an ni. Heng zawng zawng zinga sum lalut hnem ber leh subscriber ngah ber ni bawk chu MrBeast hi a ni. 

Highest-Paid YouTuber 2021
1. MrBeast - $mtd 54 
2. Jake Paul - $mtd 45 
3. Markiplier - $mtd 38 
4. Rhett & Link - $mtd 30 
5. Unspeakable - $mtd 28.5 
6. Like Nastya - $mtd 28 
7. Ryan’s World - $mtd 27 
8. Dude Perfect - $mtd 20 
9. Logan Paul - $mtd 18 
10. Preston - $mtd 16 

Sawi hmaih thiang lo T-Series
YouTube chungchang sawi tawh chuan rilruah T-Series a lang thin a, kan ram India chhul chhuak ngei a nih bawk avangin hriat loh phal chi a ni lo. YouTube-a subscriber ngah ber chu T-Series hi an ni a, subscriber maktaduai 229 zet an nei! Indian music video publishing company T-Series te hi an sang fal nalh a, subscriber maktaduai 150 nei tling dang pawh an la awm lo! 
T-Series hi Cocomelon Nursery Rhymes chuan an hnaih ber a, subscriber maktaduai 147 an nei - pathumna chu SET India (146 million) an ni. YouTube-a subscriber ngah zual top 3 te hi mimal ni loin group emaw company anga indinte an ni hlawm.  
Subscriber ngah palina chu MrBeast a ni a, ani hi mimal zinga subsriber ngah ber a ni thung. MrBeast hi PewDiePie chuan a dawt a, anni pahnih hi top 5-ah an lan phak avangin dahhniam theih an ni lo. Kids Diana Show, Like Nastya, WWE, Zee Music Company leh Vlad and Niki te chu top 10-ah an lang bawk. 
Top 10-ah hian a ram ang chuan US (4) in an thawhhlawk ber a, India (3) chuan a dawt a ni. 
K-pop star Blackpink chuan 11-na an hauh phak a, subscriber maktaduai 83 an nei - top 10-ah an inhlangkai thuaiin a rinawm. Canadian singer Justin Bieber (70.5 million) pawh top 20-ah a lang phak bawk. 

YouTube Subcriber ngah zual top 20 
Sl. No. Channel Subscriber Content Country
1. T-Series    229 Music India
2. Cocomelon Nursery Rhymes 147 Education US 
3. SET India 146 Entertainment India
4. MrBeast 112 Entertainment US
5. PewDiePie 111 Entertainment Sweden
6. Kids Diana Show 103 Film Ukraine
7. Like Nastya 102 Entertainment US
8. WWE 91.9 Sports US 
9. Zee Music Company 89.9 Music India
10. Vlad and Niki 89.7 Entertainment Russia
11. Blackpink 83 Music South Korea
12. Goldmines 78.8 Film India
13. 5-Minute Crafts 77.9 How-to Cyprus
14. Sony SAB 74.1 Entertainment India
15. BANGTANTV 71.7 Music South Korea
16. Justin Bieber 70.5 Music Canada
17. HYBE LABELS 68.8 Music South Korea
18. Canal KondZilla 66.2 Music Brazil
19. Zee TV 64.3 Entertainment India
20. Shemaroo Filmi Gaane 62.7 Music India

YouTube hi...
YouTube hi American online video sharing platform niin, an headquarters hi San Bruno, California-ah a awm. February 14, 2005 khan Steve Chen, Chad Hurley leh Jawed Karim ten an din a, a neitu tak erawh Google an ni. Google hian thla 18 hnu October 2006 khan YouTube hi tluklehdingawn $1.65 zetin an lei chhawng a nih kha. 
Khawvela website thlawhtu ngah ber chu Google Search a ni a, a dawttu chu YouTube hi a ni. YouTube hian regular taka hmangtu tluklehdingawn 2.6 vel a nei a, minute khat chhung lek pawhin video darkar 500 daih zet chu upload thar awm ziah anga chhut a ni. 
Google AdSense program kaltlangin channel neituten sum an lalut thin a, tuna YouTube revenue hi $tld 28.8 a tling. 

A behbawm
YouTube hi kan en nasa hle tih chu Mizo mipui tlemte hi a hrechiang bertu zinga mi kan ni awm e. Mihring kan tam loh ngaihtuahin YouTube channel nei ten subsciber an ngah em em a, maktaduai khat dawn nei te pawh an awm tawh a nia aw! Subscriber nuai chuang nei hi chhiar tham an awm tawh a, hei hian chiang taka a tarlan chu Mizote hian YouTube kan en nasa hle mai tih hi a ni. 
Thalaite zingah TV aia YouTube en nasa an kat nuk tawh a, naupang te hlei hlei hian an en nasa emaw tih mai tur a ni. Nakin lawkah chuan man chawia TV cable pawh ngai loa khawsak hun pawh a la awm  mahna le.