ZALEN, Jan. 04, 2025: Mizorama zaipawl hlun ber, Mizoram Synod Choir-in hla an zirna tur bik pindan, Youth Recreation Centre (YRC)-a Convention Centre buildinga siam thar chu Zirtawpni zan khan Synod Executive Secretary i/c KTP Rev. Dr. K Lallawmzuala’n Pathian hnenah hlanin a hawng.

Choir cabin thar hawnna inkhawm hi CKTP Leader Rev. Dr. Rosiamliana Tochhawng-in a kaihruai a, General Secretary Upa Lalmuanpuia leh Committee Member Tual Upa Laltlanthanga ten technical report a pe a. Asst. Leader Lalruatfela leh Synod Choir Director C Hmingthanzauva ten thu an sawi bawk.

Synod Choir hi CKTP enkawl a ni a, hla zirna tur hmun bik nei lovin hmun remchang dap chawpin an zir kual thin a. Kum 2011-a Synod Office buidling thar sak zawha luah a nih khan CKTP chuan Synod-ah Synod Conference Centre-ah Synod Choir puala room nghet neih ve a dil a, phalsak niin Synod Property Committee chuan a chhawng chung berah a siamsak.

CKTP Committee chuan Synod Choir puala pindan siam thar chu ‘Synod Choir Cabin’ tia vuahin August 9, 2011 khan khatih laia Synod Moderator, Rev. C. Lalsangliana’n a hawng a. Tunah chuan Falkland, Aizawla CKTP hmun, YRC-ah a thar an nei leh ta a ni.

Zirtawpni zana cabin thar hawnna inkhawmah hian Synod Puipa te, CKTP Committee Member-te leh Synod Choir te an tel a, Chanmari Branch KTP-in ei leh in an buatsaihsak bawk.