ZALEN August 26, 2026: Vawiin khan Hnamro Hall, Dawrpui Jail Veng-ah 'Faith Based Organizations' Response to HIV/AIDS in Mizoram Training of Trainers' programme chu Young Women’s Christian Association (YWCA), Aizawl leh Social Wing Committee (SWC), General PYD te chuan an nei.

He programme hi Kohhran hrang te nena neih tur niin vawiin hun hi SWC Chairman Lalnunpuia Pachuau chuan a kaihruai a, SWC Secretary F. Lallawmzuala leh Christina YWCA Secretary Malsawmkimi ten inhmelhriattirna hun an hmang a. YWCA, Aizawl President Dr. A. Lalchhandami chuan introductory Speech neiin HIV/AIDS laka fimkhur dan tur zirtirna a nei.

Lalremruati Tlau, YWCA chuan Training Manual Orientation a neipui a, Lalmuan Puii, YWCA chuan "Kohhranin engtin nge HIV/AIDS dona kawngah hma kan lak ang?" tih thupui sawihona kaihruaiin sawihona neih a ni. 

He training-a an zir Manual bu hi HIV chungchanga rawngbawltute puitu leh mipuite zirtirna kawnga hmanraw ṭangkai tak a nih beiseia buatsaih a ni a. YWCA leh Mizoram-a Kohhran pasarih - Baptist Church of Mizoram (BCM), United Pentecostal Church North East India, Mizoram Presbyterian Church, Seventh Day Adventist, United Pentecostal Church of Mizoram, Roman Catholic (Aizawl Diocese) leh The Salvation Army te nen tangho-a buatsaih a ni.