DOWNLOAD OUR APP

Read latest news on your phone
app-store
ZALEN AGENT TANPUII ATANGA ZIR TUR
Mar 21, 2015
Chanchinbua editotial hi editor in a ngaihdan a thailan theihna awmchhun a ni a; chanchinbu phekdangah editor ngaihdan a lang thiang lo a; a chhan chu chanchinbu mite hi mihring kan nih tho avangin politic emaw thil dang emaw duhsak zawng nei thei an ni. Chanchinthar huangah tan lam a lan chuan ‘ethics’; bawhchhiatna a nih bakah mipui rilru a tha lo zawngin a hruai thei a ni.Editorial hi chanchinbu quality tehna a ni fo bawk. Tun tum hian editoria chi 2 kan nei a. Kar liam taa Zalen agent boral Laltanpuii kan uizia piah lamah a nuna thil entawn tlak tak mai; kum 10 chhunga inthlak dang lo ze duhawm tak mai hi mipui te’n zir se kan ti a ni. Chhungte belh tur a haihchham vang niloa, mahni kea din a tum tlat a, Ramhlun Vengah mi in luahin amahin a cheng a. Kum 10 lai Zalen A sem tawh a, a chhuah tirh atanga semtu a ni a, a boral thlengin agent kan neih zinga a tha ber pawl a ni. Pathianni ni 15, March khan a chanchinbu tel a lak loh avangin office lamin an be hlawhchham tawh a, amah a rinawm ema a sem tlai Ni ni turah office lam chuan kan ngai a. An Kohhranah Primary Department zirtirtu ni bawk Tanpuii chuan Inrinni zan training a hmaih a, Pathianni zingah Zalen a sem lo bawk nen. Thil tih apiang a theih dawn loha sawi lawk thlap chi a nih avangin a thiante chuan a chennaah kalin khumah thiin an va hmu ta a ni. Tanpuii atang hian zirtur tam tak a awmin kan hre tlat a. kum 10 Zalen a sem chhungin pawisa thehluh tlai a nei ngai loa, thehluh kim loh a nei ngai lo bawk. Dam mawh hritlan emaw, chhan dang vang emawa a theih ngang loh chuan office lamah a report thlapa, a aiawh semtu tur a dah ngei ngei a ni. Agent zinga sem tha, rinawm leh thehlut tha lawmman ‘Agent of the Year’ vawi 5 lai a la tawh a ni. Zalen agent nula hian lehkha zir leh eizawnna kawngah mifate 'angin hun tha' (opportunity) nei lo mahse a thawh theih tawk a hreh hauh loa, tih tur tul nia a hriat chu a ti tawrh mai thin a ni. Hetiang dinhmuna paltlang mek hi tam tak an awm bawk a ni. Chutihrualin chhungte dinhmun that avanga harsatna hrethiam pha lo thalaite hian Tanpuii atanga zirtur an ngah zia hi an inhre phak ang em aw? Tam tak chuan an vanneihzia an hre kherlo anga ni ve tur rengah an ngai fo! ­Kum 10 chhung nungchang ngai pat a neih theihna chhan hi zir tham a tling niin Zalen lam chuan kan ngai a. A nun atang hian khawvel kan damchhung hman dan tur hmuh theih a ni a. Sum lak luh tam leh tlem lam niloin, mahni lakluh mila khawsak thiam te, chhungkaw dinhmun that lohna avanga avanga mahni inkhawngaih nei loa; tih tur hmachhawna tih zawh maite hi a zia a ni a, mahni phak tawka lungawi thiam pawh Amah nena inhmeh tak a ni.Hei vang hi a ni ang chu a nun a hahdam phiana, a bula awm a zangkhai a; 'nun hman dan a thiam a, nun awmzia a hriat chian em vang niin Zalen a thawktute chuan kan ngai. 'Tanpuii hi mi hausa a ni' kan ti. Mahni phak tawk rinawm taka thawk ngam; midang tana malsawmna ni ngam - Tanpuii te ang hi Zalen chuan a ngaisang ber a. Heng ang mi hi ram hnuk an ni.. Hnathawh tur a vang kan tih dup dup laia 'mi taimate chuan hna an tlachham lo’ tih nemhngettu tlemte zing ami a ni. Tanpui mangTha; Chatuan atan erawh a ni lo. Editor, staff leh agent te Zalen, Sunday Chanchinbu
Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh