No vehicle zone Mipui ten Krismas leh kumthar vuakveta hmun thawl zawk an neih theihnan December ni 222&23 bakah 30 khan Zodin Square atanga Chanmari inkarah lirthei tlan phallohna “No Vehicle Zone” siam a ni a, mipuite chu zalen takin an vei vel thei a ni. No Vehicle Zone hi chawhma dar 10 a\anga tlai dar 4 thleng siam a ni. Thilpek pe Central YMA chuan ni 23.12.2017 (Inrinni) khan Aizawl Central Jail-a Prisoners Welfare Committee hnenah Sound system pahnih leh a behbawm hmanraw dang eng emaw zat a pe a. Hemi puala inkhawm tawi neihah Central YMA Vice President R Lalngheta chuan, heng hmanruate hi harsa tak chunga an pek a nih avangin dim tak leh uluk taka hmang turin a ngen a ni. He thilpek hlannaah hian Asst Secy. Peter Chhakchhuak, Fin. Secy. Fabian Lalfakawma leh CEC member ten an telpui a ni. Tlawh Ni 23.12.2017 (Inrinni) khan Mizoram Governor Lt. Gen. Nirbhay Sharma leh Lady Governor te chuan Solomona Temple an tlawh a. Kohhran Thianghlim rorelna sâng ber, Executive Committee Chairman, Dr. L.B. Sailo leh a member pui ten an lo dawng sawng a. Governor leh a nupui chuan group hrang hrang thil cheimawite an fan kual bakah, Temple chhûng leh a velte ngun takin an en a ni. Krismas Kristian te hunpui pawimawh Krismas chu ni 25.12.2017 (Thawhtanni) khan lawm a ni a, Kohhran tam berin chhang ruai an siam a, Kohhran thenkhat ruai theh an awm bawk. Ni 24.12.2017, urlawk zanah boruak duhawmlo liantham thleng a awm lo. Ruai theh Ni 26.12.2017 (Thawhlehni) khan Krismas lawmnan Mizoram hmun hrang hrangah lalpiang lawmna atan ruai theh a ni. Calendar zuar Information and Public Relations Department-in Mizoram Calendar, 2018 leh Mizoram Diary a siam chu ni 27.12.2017 (Nilaini) atang khan zawrh tan a ni a, Calendar hi pakhat cheng 50 a zawrh a ni a, Mizoram Diary bu lian cheng 100 leh a te cheng 80 a hralh a ni. I&PR Department hian Calendar 70,000 leh Diary, a lian leh a te 4,000 ve ve an siam a ni. Pisa hawng Krismas chawlh hman hnuah ni 27.12.2017 (Nilaini) khan sawrkar pisa te chu hawn leh a ni a, pisa kai engremaw zat awm mahse a dawrtu mipui lam erawh an tam lo hle. Inkawm Ni 27.12.2017 (Nilaini) khan Chief Minister Lal Thanhawla chuan Project Pushpak hotute chu Chief Minister's Conference Hall-ah a kawm a, ramri hrula kawngpui leh ramri pana kawngpui siamthat hna Border Roads Organization (BRO) in a thawh tur chungchangte an sawi a.BRO hotute hian an hmalakna tichak tura Chief Minister puihna leh bawhzuipui ngaite Chief Minister hnenah hian an thlen nghal a ni. Vailiam Sawrkar laipuia National Vector Borne Disease Control Programme (NVBDCP) bultuma Mizoram district leh sub-district a Malaria dona kawnga hman tur lirthei (Bolero) thar 10 chu ni 28.12.2017 (Ningani) khan Health Minister Lal Thanzara chuan High Field, Mac Donald Hill-ah a vailiam. Larsap hmu Ni 28.12.2017 (ningani) khan All Manipur Working Journalist Union (AMWJU) member, Churachandpur atanga lo kal te chuan Mizoram Governor Lt. Gen. Nirbhay Sharma chu a chenna inah an hmu.AMWJU te pual hian hemi ni vek hian Mizoram Journalists Association chuan Hotel Ritz ah zanriah an buatsaih. Chhemthlu KTP General Conference vawi 57-na, March ni 1-4,2017 chhunga West Phailenga neihna tur Pandal, GSA khelmuala sak lai chu ni 27.12.2017 zan dar 10:30 vel khan thli tlehin a chhem thlu. Rally Central KTP in ruihhlo leh mipat hmeichhiatna hman khawlohna laka fihlim tur leh HIV/AIDS darh zel tur veng tura inzirtirna atan Two Wheeler Rally chu ni 28.12.2017 (Ningani) khan neih a ni a. Rally hi Bawngkawn Brigade Field-ah tanin Central KTP Youth Recreation Centre-ah a kharna hun hman a ni. CM kawm Ni 29.12.2017 (Zirtawpni) khan Manipur-a Zohnahthlak zinga Media-a thawk, Journalist 7 te chuan Chief Minister Lal Thanhawla chu a chenna Bangla-ah an kawm a. State pawnlama Media-a thawk Zohnahthlak Journalist te hian Mizoram Chief Minister chu Zohnahthlak zawng zawngte tan pa ber chanchang a nih thu hrilhin Zohnahthak hnam peng hrang hrang ten inpumkhatna tha zawk an neih theihna atan chak leh zuala hma la turin an ngen a ni. Hawng MJA Champhai District-in an kum 30 anih lawmna chi khat atan a vantlang tana tui thianghlim in tur Darthangvunga Traffic Point Champhai Vengthlang Presbyterian Biak In tuala Rs 1, 81,500.00 chuang seng a siam, "MJA Siktui thiang" chu ni 29.12.2017(Zirtawpni) khan Champhai District Bawrhsap Vanlalngaihsaka IAS chuan vantlang tana hman theih turin a hawng. Kumthar Ni 31.12.2017 (Pathianni) zan khan Kohhran hrang hrang ten kumtawp inkhawm an nei a, kohhran chanchin an chhiar bakah mitthi te sunna hun an hmang bawk. Zan dar 12 a pelh ah kumthar lawmin mipui an hlim hle a, halpuah hal awm tamlo mahse halmawi hal erawh an tam hle. Ni 1.1.2018 (Thwhtanni) khan kumthar lawmna inkhawm neih a ni a, kohhran engemaw zat kumthar ruaitheh awm mahse a tam ber chuan ni 2.1.2019 (Thawhlehni) khan ruai an theh. Pumna Ni 1.1.2018 a kumthar ruai thehtu Cheural Baptist kohhran mi 300 vel chu a tuk atangin an damlo. Thudawn danin heng mite hi an ruaitheh vang nia rin a niin pumna, luakchhuak, kawthalo leh khawsik tlun te in an awm a. Hetia an awm chhan hi finfiah nilo mah se, vawksa emaw Arsa emaw eisual ni bera ngaih a ni. Pisa luah Information and Public Relations Department Director thar David L.Thangliana chuan ni 3.1.2018 (Nilaini) khan office luah tanin I&PR Directorate staff-te nen Pathian hnena inhlan tharna leh lawmthu sawina hun an hmang. Kawm Mizoram Governor Lt. Gen. Nirbhay Sharma chuan ni 4.1.2018 (Ningani) khan Central YMA hruaitute chu a pisaah Kumthar thingpui inpuiin, an hmachhawpte a sawipui.