ZALEN February 15, 2026: Mizoten kût kan neih sa bakah tun hnai kum rei vak lo chhungin Mizoten kût/festival chi hrang hrang huaihawt kan uar thar hle a, he hun hi khualzin hipna atana thil tha tak a nih bakah sumdawng, a bik takin mahni kutkawiha thil siam chhuakte leh ei tur siamte tan hun duhawm tak niin a lang.

Heng kût leh festival-in a ken tel ngei tura kan ngaih tak chu sumdawngte inpho chhuahna tur siam a ni a, kût ti-kûttu pakhat pawh a tling.

Hetih rual hian sumdawngten an bungraw pho chhuahte man an chhiar danah a kalte sawisep a kai leh zeuh thin.

Nikum lam atanga kût/festival chi hrang hrang chhima kal ve ziah tlangval pakhat chuan, “Ka rin aiin thil hi a to thin, social media leh YouTube vela kan lo hmuh hian ‘a man pangngai aia tlawm’ tih hi sawi a ni ve ziah a, a ni chiah em tih hi rinhlelh a awl khawp mai,” tiin ZALEN a hrilh.

Pa pakhat pawhin ei tur man pawh a to zawk hreta a hriat thu a sawi a, “Pawn (kût hmanna hmun ni lo)-a Rs. 50-a kan ei thin hi Rs. 70/80 vel a ni tlangpui zel ni maiin ka hria,” a ti ve bawk.

ZALEN-in kar liam taa Aizawl Lammuala LESDE Kût hman a tlawhnaah pawh thil thenkhat man chu pawn lam nena inang deuh reng a awm nual tih a hmu ve bawk.

Hetih lai hian kût hmannaa inzuarte dawr fo thin nu pakhat chuan, “A man chu eng pawh ni sela, inpho chhuak thenkhat hi nu tan phei chuan pan harsa, hmun kilkhawr deuhva awm, online-a chah ngai, thlalak an tar lan bak en chian theih lohte a ni a. Hetia an rawn inpho hian pan remchangah, duhtawka khawiha en chian theih turin a awm a, an tito uchuak a nih loh chuan a tha ka ti tho,” a ti ve bawk.

Mizorama mahni kutkawiha thil siam chhuak kan tihte pawh hian an hmanrua chu state pawn atanga an lak luh tho a ngai a, hei hian thil man chhiarah nasa takin nghawng a nei thei nia sawiin, “Ram dang, state dang nena khaikhina thil tihtlawm duai hi a la har deuhvin a rinawm hrim hrim,” a ti bawk.

Kût/festival-a inphote hian ‘an thil zawrh an titlawm tur a ni’ tia thu dah sa engmah a awm lo va, a zuartute thu thu a ni a. A dawrtute pawhin an lei leh lei loh chu an thu thu a ni ve tho bawk.