Aizawl March 1, 2023: Mizo Zirlai Pawl (MZP) General Headquarters, Aizawl chuan vawiin  khan ‘Zalênna Sualtute Kawmna’ hun an buatsaih chu MZP Conference Hall-ah an hmang a, he hunah hian zalenna zual zingmi mi pali kawmna an nei a, Signatory pakhatin a telpui bawk. 

MZP hian March 1, 1966-a MNF in zalênna an puan ni hriatrengna atan kum 2019 atangin he ni pual hian hun a hmang thin a. Kuminah hian ‘Zalênna sualtute kawmna’ hun buatsaih niin, zalênna sualtute zinga mi - War Secretary Vanlalngaia, Senator Bualhranga, Brig. Gen. R Sangkawia leh Col. Lalrawnliana te kawm an ni. MZP Vice President Andrew F. Lalramnghaka’n he hun hi a kaihruai a ni.

Zirlai kalkhawmte’n zawhna hrang hrang an zawhte chhangin, Zalênna Sualtute hian thu an sawi a. "Eng vanga Hnam Movement a inpe nge?, Zalênna an sual hi an inchhir em," tih te, "Zalênna sualtute kha an thluak suksak an ni em?” tih te zawh an ni a, Zalenna sualtute chuan, "Zalenna suala inpe, nunna chan huama hnam hmangaihna vanga chhuakte kha an thluak suksak an ni lo," tih an sawi.

He hunah hian MZP President Lalnunmawia Pautu chuan thu sawiin, "Zoramin zalênna a puan laia hming ziaktu (Signatory) 61 zingah mi 8 chiah an dam tawh a, chung zingah chuan vawiinah 1 chiah a lo lang thei a ni. Kan ram leh hnam tana nunna thapa ke pen te hi an tlem telh telh a. Kum tam min dampui tawh kher lo mai thei a, an hlu takzet a. Kan hnam rohlute an ni. Chuvangin an puala hun siam hi an phu takzet a ni" a ti a. Zoram zalênna sual anih lai a, ram leh hnam tana huaisen taka beitu nunna chantate leh nungdama la awm te hi eng sawrkar pawhin ngaihsakin chhawmdawl se an duh tih a sawi bawk.

"Kan ram leh hnam tana penchhuakte hian, an thiam leh theihna, an finna bakah an nunna an thap a. Kan ngaisang hle a ni. Heng ram tana penchhuakte hi eng dinhmunah pawh lo ding se, kan ram leh hnam tana ke pen tawh an nih avangin kan zah tur a ni" a ti bawk. 

'Zalênna Sualtute Kawmna’ -ah hian Aizawl khawpui chhunga ICFAI University Mizo Department zirlaite leh Govt. Aizawl West College Political Science zirlaite leh College hrang hrang zirlai hruaitute, Hnampual Zirlai Pawl hruaitute bakah MZP chhungkuate an tel ṭha hle a ni.