April 12, 2023; Court of Special Judge (Prevention of Corruption Act) chuan Mizoram KVI Chief Executive Officer hlui Lalsawmzuala chu eiruk thubuaiah thiam loh chantirin, zan khat jail tang tur leh Rs. 4,00,000 chawi turin a hrem.

 Aizawl District Court-a Special Judge (Prevention of Corruption) Dr. HTC Lalrinchhana chuan nimin khan court thuremna a puang a. Court thutluknaa tarlan danin, Kum 2010 khan PRISM President Vanlalruata leh General Secretary RL Liantluanga te'n Lalsawmzuala lakah sum tih chingpen thu-ah Anti Corruption Bureau (ACB)-ah thubuai an thehlut a.

Saitual khua leh a chhehvela fu chingtute Loan rulhsakna sum atanga, Rs 9,08,369/- khawih chingpenah leh khuai khawi tanpuina sum, Rs. Nuai 86.63 tichingpen-ah an puh a ni. Pawisa chingpen zat hi hriat chiah ni lo mah se a ti chingpen ngei tih erawh tih finfiah a ni.

Court chuan Lalsawmzuala thubuai hi hun engemawchen a ngaihtuah hnuah thutlukna puangin, dan leh kalphung ang ni lova dikhlel taka pawisa hman khawloh leh sawrkar lehkha pawimawh tih dik loh thubuaiahte thiam loh a chantir a, nimin khan jail-ah dahluh nghal niin, vawiin chhun khan hremna a puang a, zan khat jail tang tur leh Rs. Nuai 4 chawi turin a hrem.