ZALEN Nov. 20, 2025 : Mizoram State Consumer Dispute Redressal Commission (State Consumer Court) chuan Serchhip District Hospital a nau chunga Malsawmkimi, Tlangpui khua a mi a thih chungchangah Mizoram Sorkar chu Rs. 52,20,800 zangnadawmna pe turin a ti.

Mizoram State Consumer Dispute Redressal Commission (State Consumer Court) in thuchhuah siama an tarlan danin, kum 2021 khan Malsawmkimi, Tlangpui khua chuan nau nei turin Serchhip District Hospital chu panin a inentir a. Ultrasound te tih a nih hnuah nau nei turin Serchhip damdawi inah hian admit a ni a. Admit a nih hnu hian damdawi hmangin nau vei chawp tir a ni a. Damdawi hmanga nau vei tir a nih ni hnihna zan dar 8:30 ah naute a thi sa in a hring a ni. Nau vei tir a nih hma hian naute leh a nu hi an tha vekin doctor chuan a ngai a, mahse naute hi thi saa a pian hnu lawkah thi put neiin a thi put chu a nasat tak avangin a hnu lawk zan dar 10:40-ah Malsawmkimi pawh chu Post Partum Haemorrhage (PPH) avangin a thi ve leh ta a ni. Pi Malsawmkimi hian a hmain nau vawi 4 lai a lo chhiat tawhin neih pangngaiin nau pathum a nei tawh thung a ni.

He thil thleng avang hian social media-ah Serchhip District Hospital chuan dem a hlawh nasa hle a. Mizoram Sorkar pawhin Magisterial Equiry dinin Serchhip DC (District Magistrate) chu enfiah tir a ni.

Magisterial Enquiry report hian Medical expert team in enfiah nise tia rawtna angin Aizawl Civil Hospital atangin Malsawmkimi thih danah tihsual emaw felhlel a awm em tih enfiah tir leh a ni a. Malsawmkimi hian nau vawi engemaw zat a lo chhiat tawh avang leh amah pawh kum 40 lai a nih tawh avangin engtik lai pawha nau zaichhuah theihna hmun pan tura tih awm tak a ni tih chu Medical Expert-te ngaihdan a nih thu an report ah hian a chuang a ni.

Malsawmkimi thih chungchangah hian a pasal Zaithankima chuan felhlel a awm ni a ngaiin Gauhati High Court (Aizawl Bench) ah a zualko a. Gauhati High Court hian Malsawmkimi Serchhip District Hospital in an enkawl danah hian felhlel awm ngei ni a a hriat avangin cheng nuaih nga (Rs. 5 lakhs) a lo chawi tir tawh a. Chutih rualin zangna dawmna tam zawk phut a hmun danga an zualko duh a nih pawhin a phal sak a. Zaithankima hian State Consumer Court-ah thubuai thehlutin a zualko leh ta a ni.

Thubuai an thehluh a chhannah Principal Director, Health Services chuan Tlangpui Health Sub-Centre-a a inentirna atanga a lan danin Malsawmkim hian Anaemia with Chronic Hypotension a vei niin a ngai a. Chu chu Serchhip Hospital-a Doctor-te hian ngai pawimawh lovin Anaemia atan hian an enkawl zui lova, hengte avang leh Doctor an nihna anga an mawhphurhna an hlen tawk lo a ngaiin Serchhip District Hospital a thawkte hi thiam loh a chantir ta a ni.

Serchhip District Hospital-ah hian Malsawmkimi’n nau a neih lai hian Hospital-a thawk nurse ni lo, mi dang ai kalin a enkawl a, hei hi State Consumer Court chuan a ngai serious hle mai a. Hospital-a nurse hnathawkte hian anmahni tih tur ti lova midang dam lo an enkawl tir hi State Consumer Court chuan pawi a ti tak zet a ni.