R. Dengthuama Indoor Stadium-a khelh mek Mizoram Super League (MSL) season 7 chu zanin dar 8 hian khelh chhunzawm a ni dawn a, Aizawl veng lar pahnih ramri vanga buaina nei zauh zauh Chanmari leh Zarkawt te an inhmachhawn dawn. Nizan inkhelah State pawn player tel lova khel Chawnpui BC leh Khatla TBL inkhelhah 89-73 in Khatla TBL an chak.

Zanina inkhel tur Champion lai Zarkawr BCA leh Chanmari Vikings hi court chhungah tlawm zawk nih an duh dawnlo tih a chiang a, fans lam pawhin a kohtlang lama thawm zawi zawk nih chu an duh bik hauh lovang. Veng thenawm inkhel tur an nih an nih vangin tlawm zawk nih an duh dawn lo ve ve tih a chiang a, a hmuna en pawh a inchhirawm loh khawp ang le. 

Nilaini zan dar 8-a inkhelah State pawn player tel lova khel ngam team huaisen, Chawnpui BC chu MSL hmasa ber champion TBL lakah an tlawm. Chawnpui hi an match khelh hmasak zawkah Aizawl tlaklam team tha Tuikual South BC lakah an lo tlawm tawh a, nizan inkhelhah MSL champion hlui Khatla TBL hmachhawn lehin hnehna an chang zo lo leh. An khingpui Khatla TBC pawh hi an match hmasa zawkah Zarkawt BCA laka tlawmin nizan lamah vanneiin chakna an chang thung. 

Khatla TBL tan Michael Liansanga leh Punjab player palian Arvindar Singh te an chetha a, an pahnih hian point 45 an thawk chhuak, team tang rual Chawnpui tan chetha fal an awm lo va, Zodina Chawngthu-in point 15 thawkchhuakin Lallianmawia leh Vanlalhriatpuia ten point 12 leh 10 an score thung. 

Inkhel tan tirhah Chawnpui lam an chetha zawk a, Khatla TBL tan Levi Bradley Jr. lut mahse a che ropui hran lo. Quarter hmasa berah hian fans te beiseina siam turin Mizo hlanga khel Chawnpui BC hian 20-16 in hnehna an chang. Second quarter-ah erawh inkhelh a danglam ta a, Khatla TBL lamin 25-16 zetin Chawnpui an lehthal. Third quarter-ah TBL lamin inkhelh an thunun hneh hle a, Chawnpui lamin an score hleithei lo, entu mipui mak tih point 6 chiah an hmu a, TBL lamin point 27 zet an score thung. 
Fourt quarter-ah Chawnpui lamin tlawm mai an tum bik lo tih lantirin point 31 zet an rawn thun, an inthlahdah deuh nge TBL lamin quarter hmasa an tluk phak lo va, point 21 an score. Hun tawp dawn lamah Chawnpui lam hian thahnem ngaiin khel tha viau mah se chakna an chang zo ta chuang lo.
 
Total/ Period 1/ Period 2/ Period 3/ Period 4

Chawnpui BC: 73 - 20 - 16 - 6 - 31
Khatla TBL: 89- 16 -25 - 27 - 21

Chawnpui BC
Zodina Chawngthu - 15 pts - 4 rebounds - 1 assist - 2 steals.
Lallianmawia - 12 pts - - 1 assist - 3 steals.
Vanlalhriatpuia - 10 pts - 1 rebound - 2 assists.

Khatla TBL
Michael Liansanga - 27 pts - 7 rebounds - 3 assists - 2 steals. 
Arvindar Singh - 18 pts - 13 rebounds - 1 assist. 
Lalliansanga - 12 pts - 5 rebounds - 3 assists - 1 steal.