Zanina AR Lammual-a concert nei tura ruahman Vengaboys te chu khaw awm danin a zir loh avangin Mizoramah an lo tum thei lo a, zanina an concert neih tur pawh chawpchilh taka thulh nghal a ni. Ticket lei tawhte chu ni 7-14 chhuning refund an ni dawn nia thu dawn a ni. Zanin programme zawng zawng erawh thulh a ni bik lo a, local artist te nen free concert neih a ni ang.

Vengaboys te hian vawiinah Delhi atangin Mizoram an rawn pan a, khaw awm danin a zir loh avangin Kolkata-ah hun eng emaw chen an nghak. Mahse Mizoram bakah hmar chhak state hrang hrangah ruah a sur nasat avangin flight cancel a ni a, Vengaboys te pawh an rawn thleng thei ta lo a ni - Kolkata atangin Delhi-ah an kir leh. 

Vengaboys hian December 9 hian Tura, Meghalaya-ah concert an nei dawn a, Mizoramah rawn kal hram dan an ngaihtuah thei ang em tih chu hunin a hril dawn a ni. Tura-ah hian vawiin atang khan Mecong Festival neih tan a ni a, Mizoram atang pawhin Avora Records te an perform dawn a ni.