Mipui nghahhleh em em Mizo film thar 'Mo Kawr' (Min kal san suh) chu zanin dar 8:00 hian Saikuti Hall, Lunglei-ah tlangzarh a ni dawn ta. 

Mizo Film Award 2021-a Best Actress atana thlan Rosangpuii Ralte leh zaithiam Bethsy Lalrinsangi nau Isaak Chhakchhuak te chan dunna a ni a, a hmuhnawm loh ring suh. He film hi B. Lalbiakvela (Bva Sialton) leh Ngaihawma Fanai te kutchhuak a ni a, a sulhnu enin rinhleh tur a awm lo - a en tlak dawn.  

Bv-a leh Ngaihawma te hi Mizo film chhuak tawh zinga hit ber pawl 'Dengi I Love You' film siamtute kha an ni a, an kutchhuakin belhchian a dawl thin hle. Covid-19 len lai khan 'Nu Kawki Pasal' an siam a, hei pawh hian ngaihhlut a hlawh hle a nih kha. 

Tun tuma an tihchhuah tur 'Mo Kawr' hi Rosangpuii channa a nih avangin mipui en chak a ni leh dawn a, Isaak Chhakchhuak hian hming a lo chher tawh avangin en chak an tam leh zual ang. Anni pahnih bakah hian K. Lalawmpuia a inlan leh dawn bawk a, a talent neih that zia kan hmu leh dawn. Awmpuia hi 'Nu Kawki Pasal' film-ah khan Rspi nen hian an chang dun nghe nghe a, Tlau Entertainment buatsaih Mizo Film Award-ah khan Best Supporting Actor chawimawina phu taka hlan a lo ni tawh bawk.

'Mo Kawr' (Min kal san suh) film hi zanin dar 8:30 ah Lersia Play App an en theiha dah chhuah nghal a ni ang - premiere zanah en tur a awm nghal dawn tihna a nih chu.