Mizo film thar 'Rini leh Rina' chu zanin January, 19, 2024 (Zirtawpni) hian tlangzarh a ni dawn ta. Tlangzarh hun hi Aizawl-a hall hming thang Vanapa Hall-ah hman a ni dawn a, dar 7:30pm ah tan a ni ang. 

Khawthlang tihdan entawnin Mizoram-ah pawh film premiere-ah hian red carpet buatsaih thin a ni a, zaninah pawh buatsaih a ni leh dawn. Red carpet-ah hian sawm bikte kawmna hun leh thlalakna hun hman thin a ni a, an intihmuh chho zel ni pawhin a lang.  

'Rini leh Rina' film hi In-House Production kutchhuak a ni a, an kut chhuak hrang hrang entawhte chuan beisei an nei sang leh dawn tih a lang. Film pali (4) an siam tawhte a hit hlawm hle a, sum pawh an hailut tha hle tih a lang. 

Mizo film industry-in hma a sawn zel a, tunah chuan eizawnna tlak a ni chho ve mek. Film siamtute hian thalai tam tak tan eizawnna an chhawp chhuak chho mek a, thalai tam tak mipui hriat an hlawh phah a, hei hian kawng tam takah rah tha a chhuah mek a ni. 

'Rini leh Rina' film hi a hmuna en duh tan ticket siam a ni a, Rs. 50/- man chauh a ni. A hmuna en ve thei lo tan pawh Lersia Play App-ah man chawia en theih a ni ang.