Aizawl: Zarkawt Presbyterian Kohhran chuan an veng chhunga zu dawr awm tihtawp ngiata thutkhawm (sitting demonstration) an neih chu nimin chawhma dar 11 khan an titawp. Zirtawp tlai khan Zarkawt kohhran hruaitute hian Chief Minister Lal Thanhawla chu an hmu a, an veng chu missionary te iptepui banna hmun, sikul leh biakin awmna hmasa, A,Aw,B siamna leh Bible lehlinna hmun a nih vang tein zu dawr hawng lo turin an ngen tih Zalen palai an hrilh a. Chief Minister hian an thu thlen chu sawrkara a thawhpuite lo sawipui a tum avangin beiseina sang tak nei chungin an titawp ta tih an sawi. Zarkawtah hian MAMCO chuan zu dawr hawngin he dawr hi titawp turin leh mipuite pawh lei lo tura ngenin dawr bulah hian Zarkawt kohhran mi eng emaw zat an thu thin a. Zarkawt kohhran hruaitute chuan zu lei turte chu an dang bur lo nia sawiin a duh chuan an lei tho a; mahse, an ngenna zawmin mi tam tak chuan an lei loh phah tih an sawi. MAMCO thawktute chuan mipuiin an chim luih luih loh nan Zarkawt ah chuan zu changkang, Rs. 500 chin chung lam chauh an zuar tih an sawi a, dawrtu an awm ve reng nia sawiin hmun dang nena tehkhin erawh chuan an tlem deuh tih an sawi bawk.