ZALEN Nov. 11. 2024; Health minister Lalrinpuiin December, 2024 atangin Zemabawk-ah cancer zai tan theih an beisei niin a sawi.

Vawiin (11.11.24) a thuthar thehdarhtute a kawmna-ah he thu hi sawiin health minister chuan, cancer hospital tha zawk leh changtlung zawk an buaipui mek tih a sawi a, cancer zai tur doctor an neih pawh zai thei turin hmanrua leh thawktu an pe tih a sawi.

"Cardio-thorasic lamah te, kidney transplant lamah te pawh mithiam kan nei a, sawrkar a la thawk lo te pawh lak an nih theihna turin proposal siam turin ka ti a, IVF lama thawktu tur lakna proposal hi ZMC lamah an la buaipui mek a, cardio thorasic thawktu lakna tur hi finance department lamah a la tang mek a, kidney transplant lam hi DHME lamin tihtur eng eng emaw an la buaipui bawk," tiin health minister chuan a sawi.