Hmanni chu tawnsabawpin mikhual pahnih ka tawng a, an hmel enin an tlawm na a, an nunah erawh zir tur tam tak kan nei. Burma mi an ni a, Halkha atangin bawng an rawn kai a, thlasik khaw vawt hnuaiah ni sarih zet an rawn thang a, a remchanna hmun apiangah, ramhnuaiah pawh riahbuk an sual mai a ni.

Heng mite hian zingah Mizote kan mu rei lutuk leh thalaite kan tho tlai lutuk hi hi mak an ti khawp mai. An mak tih zia hahipin an sawi. An tia lawm, “Kan ramah chuan khawvar tirhah kan tho mai a, naupang pawh kan kai tho a, tih tur kan tuk a, zirlaiin lehkha an zir a, tumah kan mu rei ngai lo. Zingah hma takah chaw kan ei a, zing dar 6-ah chuan kan hnathawhna hmun, huanah emaw leiletah emaw kan awm deuh vek tawh. Mizoram chu zingah in mu rei si, hna thawk in kal tlai thei si” min zuk ti a maw le! “In sawrkar hi a tha em a, sawrkar zarah ei in hmu mai mai a ni,” min la ti ta deuh deuh. Rim taka hna thawk thin, mahni kea ding a, sawrkar puihna telloa mahni kut kawih ngeia intodelh te chuan min lo ngai sang lutuk lo khawp mai.

Zingah thalai kan mu rei lutuk hi chu a zia lo ngawt mai. Zing ni chhuah hnu fe, dar 7, dar 8 dawn thleng thlengin thalai zawk kan mu vum thur mai. Ni chhuah rual vel tal hi chuan tho thei ila a tha ngawt mai. Tin, zing tho hma thang te hi an harh vang nge nge bawk. Zingah chuan boruak a thiang nuam bik a, khawl khu leh motor khuin a pawlh buai loh zing boruak thiang tak han hip vang vang hi man hla deuh a sin. Zing tho tlai thang chuan chung te chu an chan a, an mut rei avang khan mut an kham chuang miah lo bawk. Thalai tam tak hi tukthuam ei dawnah an tho chhur chhur a, an ham bui bui a, phak chualin chaw an kil a, biak ngam pawh an ni mang lo.

Bible-a Pathian mi hman zawng zawngte hi zingah hma takah an tho thin. Abrahama te, Jakoba te, Mosia te, Joshua te, Davida te, Samuel-a leh mi dang tam takte kha zingah an mu chuah chuah ngai lo. Bible-ah an chanchin han chhiar ila, “Zing takah a tho a,” tih a ni vek mai. Isua pawh kha a pa hnenah tawngtai turin zing takah a tho thin. Israel fate pawh ram tiam Kannan pana an kal lai khan Pathianin van manna in a chawm thin a, van atanga lo tla Manna kha zing ni chhuah hmain mi tinin an khamkhawp an char thin. Zing ni chhuah hnuah chuan a tui ral vek thin. (Exodus 16:21). Zing ni chhuah thlenga mu burh burh chuan manna chhar tur an nei ve dawn lo tihna a ni a, nilengin an riltam reng mai dawn a ni.

Mut rei hrim hrim hi mihring hian kan mamawh lem lo. Mi pangngai tan chuan darkar 7 emaw, darkar 8 mut chu a tawk em em a ni. Zinga thalai tam tak kan mut rei chhan chu zanah rei tak tak kan men vang a ni. Zan dar 12 leh zing dar 1 thleng thlenga meng thin kan nih chuan zing thawh hma chu a har viau ang. Chuvangin zing thawh hma kan duh chuan zanah pawh kan mu hma tur a ni. Hnathawk leh sum lalut zawnga meng rei kan nih si loh chuan a pawnga a taka zan meng rei hi kan sim a tha ngawt mai.

Thalai tam tak men rei chhan chu mobile phone a ni. Mobile phone-ah online game an khel a, rei tak tak an meng a, mut nachang an hre mang lo. Zan khaw tairek thlenga an men miau chuan zingah tho hma tura beisei chi an ni lo hrim hrim, an tlin lo. Chuvangin, mobile phone hman kawngah pawh hian chhungkhua hian inkhuahkhirhna dan kan neih hi a tul ngawt mai. “Rik rum thilah lo chuan zan dar 9 hnu lamah tuman mobile phone khawih tawh loh tur, zan dar 10-ah chuan mut vek tur,” tih dante hi chhungkaw pa ber hian kengkawh thei ila a tha ngawt ang.

Chhungkaw pakhat chuan zan mut dawnah pa ber hnenah an mobile phone an pe thliah thilah a, zingah an pa chuan a pe let leh mai a, tumah mobile phone vangin zanah an meng rei ngai lo. Zanah an men rei loh miau chuan zingah pawh an tho hma nge nge bawk. Hetiang ti ngawm chhungkaw pa, hetiang tih nachang hria chhungkua hi kan mamawh ta khawp mai.

Hawh u, tih tur a awm emaw, awm lo emaw, zingah hian thawh hma i zir teh ang u. Kan thawhhma miau chuan eng emaw kan ti a, a sawt hrim hrim, kan hriselna pawhin a that phah nge nge bawk.