Aizawl: MPCC Media Department chuan tun hnaia Congress party atanga hnawh chhuah, R.Lalzirliana chuan MLA anih chhungin Saitual district chungchang emaw Tawi bial hmasawnna tur emaw a thlen ngai lo tih an sawi. Nimin khan Aizawl Press Club-ah chanchinbumite kawmin MPCC Media Chairman Lallianchhunga chuan Congress party in R.Lalzirliana lakah englai mahin rilru thianghlim lo a pu ngai lo tih a sawi a. “R.Lalzirliana chu district leh bial chhung development an lo sawipui tawh thin a. A bik takin district chungchang sawitute phei chu sawi tawh lo turin a ti hial a, a bulah thil sawi a harsa em em a, lo hauh vakte pawh a ching a. Tunah hian Saitual district demand tihhlawhtlin tiamin MNF ticket-in Tawi bialah din leh a tum mek a. Mahse, lemchang mai a ni,” a ti. Tawi biala MPCC candidate Rosiamngheta pawhin thu sawiin bialtu MLA R.Lalzirliana chuan a bial hmasawnna chu Cabinet meeting-ah pawh a sawi chhuak ngai lo nia sawiin a bialin hma a sawn loh avangin mipui an lungawi lo hle niin a sawi.  “District tih puitlin kawngah hian dan angin ka bei dawn a, a fu ke hmasa atan Treasury dah a ni,” a ti bawk.