Aizawl: School Education department hotute chuan Mizoram puma zirlai naupang 150,854-in chhun chaw (midday meal) an dawng mek tih Zalen an hrilh. School Education thawktute chuan Mizoram hmun hrang hranga midday meal dawng zirna in 2582 a awm niin thudawnna chuan a sawi . Kum 2006, February ni 15 atanga Mizoram-a kal tan pui midday meal chu chat lak awm lovin kalpui zel a nih thu Lalrintluanga, Joint Director of Adult Education chuan Zalen a hrilh a. Midday meal chu naupangin an thatpui leh thatpui loh zirchian a nih thin thu sawiin, midday meal kalpui a nih hma aiin naupang chu an harh vang zawk tawh nia an hriat thu a sawi. Lalrintluanga chuan naupangte'n chaw tha an ei ngei theih nan Food Poisoning awareness campaign district hrang hrangah neih thin a nih thu sawiin,'zirtirtute'n an ei ngam ngei naupangin an ei tur a ni' tih chu an kalpui thin dan a nih thu a sawi a. Naupangte'n chaw tha an ei theih nan Health leh PHE department te thawhpuina hnuaiah kut sil dan leh tui thianghlim ngei in tur chungchangte zirlai naupangte zirtir an nih thin thu a sawi. SE a thawktu pakhat chuan midday meal chuan zirna in tan hma a nih hnu ah zirlai naupangte'n midday meal a tangkai mai bakah chaw pek hun pawh an ti danglam hialthu a sawi. Kum 2015-16 chhungin midday meal atan sorkar laipui atangin cheng nuai 2174.93 hmuh tawh a ni a, Mizoram sorkar atang erawh chuan an hmuh zat tur a la chiang lo thung a ni. Kum 2015-16 chhung atan Project Approval Board chuan midday meal dawng turin primary-ah zirlai 90919 leh middle school-ah zirlai 42825 a pawm tawh bawk a ni.