ZALEN July 22, 2026: Vanapa Hall kawta vawiina Mizo Thalai zirlai pungkhawmin kumin leh kum danga NEET examination paper pût-ru dona leh dem a neia an dikna chanvo atana an beihna chu, ZPM Media & Publicity Dept. Chairman B. Lalchhanzova chuan thuchhuah siamin ZPM-in a thlawp tlat thu a sawi.

"India ramah ṭhalai, zirlai maktaduai tam takin NEET examination question paper putru avanga harsatna leh manganna an tâwk mêk tih kan hria a. Vawiinah Vanapa Hall kawtah zirlai an pungkhawm a, anni zinga tam takin 'professional course' an neihna turin an bei a. India ram laili chauh ni lo, keini state tê te pawh min nghawnga a pawi kan ti khawp mai," tiin B. Lalchhanzova chuan a sawi a.

ZPM Media & Publicity Dept. Chairman hian zirlaite hun leh pawisa hloh te, an rilru a ṭhalo zawnga a nghawngna te avangin pawi a tih thu a sawi a. "Keini ZPM chuan he thil thleng hi pawi kan ti a, nu leh pa tam tak rilru a nâ a. Chutih rual chuan buaina siam lo zawnga zirlai rilru dik pu ten an dikna chanvo atana an beihna hi kan thlâwp tlat a ni," ZPM Media & Publicity Dept. Chairman Minister B. Lalchhanzova chuan a ti bawk.

"Zirlai ṭhalaite manganna hi thinlung takin ZPM chuan a takin kan tawrhpuiin kan hriatpui a ni tih hi Zoram mipui mai ni lo, khawvel hriatah kan puang chhuak a ni," B. Lalchhanzova chuan a ti.

B. Lalchhanzova chuan ZPM sawrkar chuan theihtawp chhuahin dik takin police lâk dan a kalpui thu a sawi a. Office hna lâkah pawh a dik thei ang bera kalpuiin, siamṭhat ngaite leh tih dik ngâite a la awm a, a ṭha thei anga kalpui zêl tur a nih thu a sawi bawk.