Aizawl: Chief Minister Lal Thanhawla chuan tunlai zirlai naupangte ah tumna (ambition) fumfe tak neia zir an tam lo nia a hriat thu sawiin, "A hniam a ni emaw, a sang a ni emaw zirlaite hian tumna an neih a pawimawh a, tumna mumal tak neia zirna kawng zawh hi thil tha tak a ni," a ti. Tuipuiral Zirlai Pawl ten Zirtawpni kaltaa General Conference vawi 32-na Leisenzo khuaa an neih a hmanpuinaah he thu hi sawiin Chief Minister chuan Mizo tawng chu a hausain a mawi hle tih a sawi a, "Tunlai thalai te hian kan tawng hman dan avangin kan tawng hausakna hi kan ti chhe mek em tih kan ngaihtuah chian ka duh a, kan tawng tih hausakna kawngah tan la turin zirlai te hi ka duh che u ni," a ti. Chief Minister chuan ama tawnhriat thil hrang hrangte sawiin zirlai ten an nu leh pate thuawih a, aia upa zahna te an neih chuan naktuk naktipah an ni hi khawtlang, Kohhran leh ram hruaitu leh nghahfak te an ni dawn a ni, a ti a. Taimakna atana hriselna a pawimawh dan sawiin zirlai kalkhawmte chu thianghlimna ngai pawimawh a, mahni inthununna nei a, ei leh in ah insum a, zuk leh hmuam ah te fihlim turin a chah a. Cancer leh HIV/AIDS ah Mizoram dinhmun chhuanawm loh hi ngaihtuahin he thil hi zirlaiten veia ngaihtuahna seng turin a ngen a, hengte hi Mizoramah a vei an tlem theih nan midangte zirtira, theih tawpa an theihna apianga tan la a, midangte entawntlaka  awm turin zirlai te hi a chah a ni. He programme ah hian Tuipuiral Zirlai  Pawl in an member zirna kawnga hlawhtlingte puala chawimawina thuziak an buatsaih chu Chief Minister Lal Thanhawla, CM nupui Lal Riliani leh bialtu MLA Pu T. Sangkunga ten zirlai ti tha te hnenah an hlan a ni.