ZALEN Oct. 7, 2024; Sesawng nula leh tlangval thenkhat, school, college leh university zirlaite chu an, kartawp an hunawlah bazar-ah thu in chawhmeh an zuar thin.

Sesawng branch YMA hruaitute hnen atanga ZALEN thudawn danin, Sesawng nula/tlangval leh tleirawl thenkhat, higher secondary, college leh university zirlaite chuan, school, college leh university an kal loh/chawlh remchan lai kartawp inrinni-ah sesawng atanga an chhung ten chawhmeh an thawn chu Aizawl a treasury bazarah zuarin an thutpui thin a, taima tak leh thawh hreh nei loin an hunawl an hmang tangkai thin.

Thenkhat chu inrinni a pianga regular taka thu an awm laiin, thenkhatte chu an chhungte remchan loh a pianga chawhmeh zuara thu thin an ni. (Anni anga ṭhalai/zirlai thawh hreh nei lo hi tam tak an awm ang.)

Thalai hnathawk rual an ni a, ramtang rual an ni bawk. Zirna lama thahnemngai rual an nih bawk avangin, zirna lamah an rilru an pe lo thei lo a. An chhungte puiin an hunawl tha takin an hmang thin bawk. Thalai entawn tlak leh taima thawh hreh nei lo an ni tih a chiang a, an zirna-ah pawh hlawhtlinna duhawm tak an la chan ngei a rinawm.

Sesawng khua hi thlai leh thei lam thar tam khua an ni a, thlai leh thei a Aizawl chawmtu khaw langsar tak pakhat an ni.