Aizawl August 2, 2024 : Mizo Zirlai Pawl (MZP) General Headquarters, Aizawl Executive Committee meeting vawi 632 na chu vawiin khan MZP Conference Hall-ah neih a ni a. Aitlang, Vairengte ramri tlawh chungchang leh Zofest neih hun tur te an rel a, Zirlaibu a thlawna sem tur la sem zawh loh thlenna hmun an tlawh bawk.

Meeting hi MZP President H. Lalthianghlima'n a kaihruai a, MZP hruaitute'n July 31, 2024-a Aitlang, Vairengte-a Mizoram ramri; Assam-in a rawn nek buaina hmuna state pahnih (2) ten kut thlak loh (Status quo) kenkawh tura tih a ni chunga, Assam Police-in an camp panna tur kawng an rawn laih chu tlawh a ni a. MZP ngenna anga Kolasib DC leh Cachar DC te inbia-in, Assam-in an kawng laih mek titawp tura hrilh an ni chu MZP lawmawm an ti. Mizoram ramri venghimtu sipai camp kal pawhna kawng chhe lutuk leh kalpawh zung zung harsa lutuk chu tha taka siam vat turin MZP chuan sawrkar a ngen nghal a bawk.

Zirlaibu a thlawna sem tur la sem zawh loh chungchang pawh rel niin. Meeting chuan kum tina hetiang buaina thleng ziah hi a hrethiam lo hle a. Zirlaite ngaihsak tawk loh naah a ngai a ni. MZP chuan kumtin buaina ni chunga chinfel tumna awm lo thin chu sawrkar thar hian ruahmanna felfai tak siam nghal se a duh a. MZP hian Meeting zawhah zirlaibu thlen tawh dan, a dahkhawmna hmunah a enfiah a. Zirlaibu tam zawk thleng tawhin, a la thlêng lote pawh kawng lakah a rawn kal mek tih an finfiah a. A mamawh tute hnen a thlen vat theih nan enzui zel an tum.

MZP chuan zirlaibu chhut nana, Mizoram Sawrkar-in Cheng nuai 100 Budget a a dah chu lawmawm a ti hle a. Hei hian Zirlaibu chhut nana sum lama harsatna a tihziaawm ngei a rinawm. Chutih rualin kum lo kal zel turah hetiang buaina a thleng leh a nih chuan MZP chuan na takin hma a la dawn ani.

Zofa inkhawmpui lian 'Zofest' chu ni 3rd - 6th December, 2024 chhung hian W Phaileng a neih tura rel a ni bawk.