Social Welfare Minister Dr K Beichhua chuan ruihhlo a hluar zel avangin ruihhlo do leh invenna zirlaibua telh tuma hmalak a nih mek thu a sawi a, academic sssion tharah hman theih ngei tura theihtawp chhuah a nih thu tualchhung chanchinbu a hrilh a ni. Hemi chungchangah hian education department hotute nen pawh inbiakna neih mek a nih thu a sawi chhuak a, thuthlukna siamtu tur chu council of ministers an ni dawn a ni.

Kan ramin ruihhlo a tawrh nasat dan chu sawi hian a siak lo a. Mizoram drug history hre deuhte’n an sawi dan chuan kum 50 kalta khan a mum chi hi a rawn chhuak tan a, khuh damdawi hi 1980’s atangin a hluara, chutah khawvel danga inchiu nana an hman ngai loh ‘synthetic opiates’ proxyvon chuan 1990’s- 2000’s bawrah kan thalaite a suat zawih zawih a ni ber a. A dam khawchhuak tlemte chu an thatlai huna ram tana thawk thei an ni ngei anga, an theih tak si loh avanga ramin a tawrh tur zia te hi zir tham a tling ang chu mawle! Tunah hian heroin leh a chi dang ten min chim leh mek bawk a ni.

Heng hunlai kan sawi thalaite hian taksa a khawih chhiat theih dan chu sawiloh an sim hnu pawha nun a tihchhiat (low quality of life) dan te an hisap pha miah lo a, media, kohhran leh khawtlang pawhin tihngaihna a hre lo ti ila a sual thui lo ang.

Naupan lai atanga inzirtirna hi a nghet duh a, puitlin hnuah nghet takin an vuan dawn a ni. Ruihhlo hi chu tihchhin loh a him ber avangin ‘insawithaih’ zawnga kal pawh hi a pawi lohna thui tak a awm tawh a. Hetianga naupang zirlaia ruih-hlo do leh a inven dante a tel tur hian chhuan lo awm lehzel tur pawh a humhimin a rinawma, hri tha lo darh zel tur thlengin engngemaw chen chu a veng thei dawn niin a beiseiawm a ni. A tirah famkim nghal vek lo mah se, hmasawn pui theih thil a ni tih a lang a, mithiam te pawh rawn zau zel ni sela a tha khawp ang. Hetiang tih nachang hria Minister kan ni hi fak tur pawh a ni ang.

Tunlaia thil hluar tak chu damdawi company te’n an siamchhuah ruih theih ho si hi a ni a, damdawi dawr loah lei tur a awm leh nghal a ni. Heng hlauhawm dan te pawh hi naupang zirlaiah hian telh theih ni hial sela a tha khawp ang.

Khawtlangin ruihhlo kan do a, ‘supply reduction’ leh ‘demand reduction’ a kal kawp a pawi mawhna a lang reng tawh a, ‘demand reduction’ hi a hniam a nih chuan ‘supply’ lam hi a tlakhniam mai a rinawm bawk a. Zirlaibua ruih-hlo do leh invenna lam inzirtirna telh hian kori a tu ngei ang.