Aizawl: Chief Minister Lal Thanhawla chuan, "Zirlaite hian an scholarship hmuh tur hi budget session zawh ah a kim vekin an hmu mang," a ti. Nimin Vanapa Hall a Aizawl City College Joint Students Union in general conference vawi 1-na an hman-naah he thu hi sawiin Chief Minister chuan, “Central sawrkarin tribal scholarship 100% a tum thin chu 90% chauh tumin 10% chu state tum turin a ti thar a. Sum hi min pek tlai avangin Planning department lamin plan atan engkim ruahmanna siama an lo semdarh tawh avangin phawrh leh ngaihna a awm tawh lo va. Budget session neih zawh veleh kawngzawh ngai lovin pek a ni dawn a ni,” a ti a. Scholarship sem thuai anih theihnan Mizoram Scholarship Board chuan pisa chawlh ni pawh sawi lovin hna an thawk mek nia sawiin Scholarship chu kawngzawh vanga hmuh kim theih a ni lo niin a sawi bawk. School tan hun sawn hma thuah CM chuan, "Inhlawhfa tam tak awm te tan hun tha leh thawl siam kan duh vanga sawn kan ni a. A tha lo tih kan finfiah chuan sut leh theih a ni," a ti. Chief Minister chuan zirlaite chu tih tak zetna nen lehkha zir turin a chah a, a bikin English leh Hindi-ah tan la thar turin a fuih a. Hmarchhak state dangte central service leh secretariat lamah thahnem tak an lut nia sawiin ngaihven turin a chah nghal. %%%%%%%%%%%%