Kolkata a inbun Nalanda Institute of Advance Studies (NIAS)-a Bachelor of Hotel Management (BHM) zirtur a thlan, Mizo thalai thenkhat te chuan NIAS chu zirna in lem anih bakah an insawi angin zirlaibu, hostel awmna leh thildangte an pe lo niin an sawi a. He Institute a zirlai tirh thuah pawh inhnialna awmin Mizoram Youth Commission (MYC) nge Mizoram Building & Other Construction Workers Welfare Board tih hriat a har hle mai a. MYC Chairman chuan an tirh a nihloh thu leh mawh an phurh loh thu sawiin a tirtu chu Welfare Board lam niin a sawi a, a dik turah ngai ila. Mizo thalai lehkhathiam ten ram danga hna an thawh theihnan Mizoram sawrkar chuan nasa takin tan a la a, hemi kawnga Mizoram Youth Commission hnathawh hi a ropuiin fak pawh an phu tak zet. An hmalakna in thalai sang chuangin eizawnna kawng thar zawhin hna an thawk mek a, an chhungte an chawm mai bakah sum tam tak Mizoram ah a luang lut a, kan ram pawhin kan chhawr tan mek a ni. Engpawh nise tunhnai thilthleng hi a pawi a, Nalanda Institute of Advance Studies (NIAS)-a zirlai tirtu hi Mizoram Building & Other Construction Workers Welfare Board pawh lo ni ta tehreng se zirlai kal turte thlahna ah MYC Chairman in thu a sawi avang te, sawrkar Press Release ah meuh pawh Mizoram Youth Commission tirh nia an tarlan avangin MYC hi a hmingchhe tel a, he a hmingchhiatna tireh tur hian nasa lehzuala tan a lak a ngai ang. Thil pawi leh mak tak chu zirlaite zirna senso zawng zawng tur a tira an pe vek hi a ni a, tunah chuan complaint pawh siamin sum dil let dawn pawh ni ta ila, thil buaithlak tak a ni tawh ngei ang. India ram hi mi chitin, hnam tin leh sakhaw hrang hrang bia te awmkhawmna ram a ni a, mi dik leh fel tak tak karah hian misual, hlemhle, mi bum tuma vakkual reng hi engemaw zat an awm ve bawk a. Zirna in tha nia inchhal, a tak engmah awmlo leh inbumna engemaw zat a awm avang hian fimkhur a tha a. Zirna in tam tak hi website leh prospectus a an intarlan ang hi a hmuna kal chilha finfiah hian an insawi ang an ni lo fo mai. University lem a tam em avangin UGC hial pawhin mipui ten a lem leh a tak an hriat theihnan, an pawmpui zirna in (recognise institution) te chu a puangchhuak hian thin. Tunhnaia NIAS thilthleng hian zirlaite rilru nasa taka a hliam dawn bakah an zirna te a ti sukuk ang tih a hlauhawm a, tun tum thilthleng hi sawrkar tan pawh fimkhur a tulzia zirtharna atan leh bengharhtu ah hmang thei se a duhawm hle. Tun hnuah chuan zirna in te nen inremna ziah tur a awm anih chuan finfiah hmasak a, zirchian hmasak hnuah chauh hmalak thin ni tawh se a tha ang.