Aizawl; School Education Minister H.Rohluna chuan, "Zirna pawn lam thila tui zirlai ni si an tam ta lutuk hian Mizoram ah zirna a tichhia a ni," a ti. Nimin Vanapa Hall a Siamsinpawlpi(SSP),Headquarters, Aizawl din champha vawi 25-na lawmna ah he thu hi sawiin Minister chuan zirna thil tum pawimawh lai ber chu mithiam chhawrtlak leh mi puitling chher chhuah a nih thu leh exam na pass vanga pawl sawn ringawt a tawk lo tih a sawi a. Zirlai pawl hrang hrang te chu zirlaite tanpui tur leh zirna tih hmasawnna atana din an nih angin zirna huang chhungah hma la thin turin a chah bawk. Minister chuan,"Zirna chuan mimal nun a tihhmasawn bakah inrintawkna te a siam sak a, nu leh pa tan pawh fate tana zirna tha pek chu an mawhphurhna lian ber leh an fate tana rohlu ber siamsakna a ni," a ti bawk. Siamsinpawlpi, Mizoram bik hi kum 1989 a din a ni a, Silver Jubilee lawmna hun hi MLA 3 Lalrobiaka,Lalthanliana, Er. Lalrinawma leh AMC Chairman Zarzoliana ten an hmanpui a ni.