Mizorama tlawmngai pawl lian ber Young Mizo Association (YMA) chuan kumtinin kumpuan an nei thin a, kumin atana an kumpuan chu ‘Zirna uar’ a niin a bultan nan Zirtawp zan khan Aizawl khawpui chhunga Branch hrang hrangte chu Vanapa Hall-ah kokhawmin hawn a ni ta a. Kumpuan hawn a nih tak avang hian chak lehzualin hma an la tawh turah beisei ang.

Mizote hi tih tak zeta kan beih chuan kan zirpuite lakah pawh a thiam pawl leh a chungnung pawl kan ni zel thin a. Tunhma deuh chuan All India Service leh Central Service hrang hrangah pawh a titha pawl leh tribal ah phei chuan a lut tam pawl kan ni thin. Mahse tunhnaiah nasa takin kan tlahniam a, All India chu sawi loh Central Service ah pawh lut kan awm ta meuh lo. Kan office hrang hrang han en ila, a hotu lian chu hnamdang an ni ta fur mai. District lamah pawh a thuneitu chu hnam dang IAS te an ni ta fur mai a, hei hian inenfiah a, hmalak kan ngai hle tih a lantir a, YMA in kumpuan atan Zirna Uar an thlang pawh hi tih awm tak a ni reng a ni.

Central Service ah Mizo tam zawk kan luh theihnana sawrkar hmalakna chu a tawk tak loh avangin Kohhran meuh pawhin ke a pen a, tunah tlawmngai pawl lamin hma an la dawn ta a, kan hmabak hi a eng hle turah beisei ang. Sawrkar, Kohhran leh tlawmngai pawl te hian eng anga nasa pawhin tan la mahse a pawimawh ber chu zirlaite hi an ni. Zirlai ten tumruhna leh taimakna kan nei tlem ta hle niin a lang a, kan state chhunga hna kan thawh theih chuan kan duhtawk mai niin a lang. Chuvangin zirlaite hian kan puanven sawichhingin tih tak zetna nen tan kan lak thar a pawimawh a, mi fate theih ang hi kan thei ve a ni tih rilru kan put phawt chuan nasa takin hma kan sawn ngei ang.

Zirna uar hian a tum ber chu mi hmantlak chherchhuah a, a tam thei ang ber All India Service ah Mizo thalaite awm tir niin a lang a. Tun dinhmuna kohhran leh khawtlang pawhin kan tih tur chu programme tam lutuk tih tlem a ni. Tuna kan awmdanah hi chuan Kohhran leh NGO te hian programme kan ngah lutuk a, nu leh pa ten kan fate kan chhuahsan nasa lutuk hi kan chhiatpui tih hi kan pawm a ngai ta. Chhungkua in hun hmangho tam ila, nu leh paten kan fate awmdan hrechiangin tanpui an ngaihna apiangah pui thei zel ila zirna lamah pawh hma kan sawn ang a. Kan rama sualna hrang hrang te pawh hi a tlem phah ngei a rinawm e.