Aizawl August 28, 2024 : Thil thleng tak tak behchhana siam Lalnunsiama (SVP) kutchhuak Million Dollar Boy tih film chu August 30 zan hian Vanapa Hall-ah tlangzarh a ni dawn a, Lersia Play-ah en theiha chhawpchhuah a ni ang.

He film-ah hian nuihna tur a awm vak lo mai thei - a taka thil thleng behchhana siam a ni tlat. Kum 2002-a Assam leh Meghalaya inkara misual ten Aizawl - Guwahati Sumo an suam tum a, a u leh a chuanpuite aiawha pawisa hmuhna atana an hruai tura inpe Mizo tlangval chunga thil thleng behchhan film a ni.

He film hi sawi tawh angin Lalnunsiama (SVP) kutchuak a ni dawn a, ani hian film eng emaw zat a lo siam tawh avangin a kutchhuak hmuh a chakawm tawh hle. Shooting hi Assam hmun karkik tak takah an nei a, a hautak tur zia chu a hrethiam mai awm e.

He film-ah hian Kolasib tlangval Andrew Laltlankima a inlan leh dawn a, en tichakawmtu pakhat a ni. Nunna Thar, Mimi leh film dangahte pawh lo inlan tawh a ni a, lemchan a thiam zia hriat sa a ni. A ni bakah hian Ambush film-a hnehsawh taka inlan Sangtea hmuh tur a aw dawn bawk - Director of Photography hi Lenry Renthlei a ni.