ZALEN January 28, 2025 : Mizo Students’ Union General Headquaters hruaitute chuan vawiin khan Chief Minister Lalduhoma chu a Pisa-ah an hmu a, zirtirtu an hnathawhna hmuna awm tha duh lo report an dawn chungchang an thlen.

MSU hruaitute chuan Chief Minister hnenah hian kumin sikul hawn hun a pelh tawh hnu thlenga mahni hnathawhna hmuna awm tha duhlo zirtirtu report an dawn chungchang te, Mizoram hmun hrang hrang zirna in-a zirtirtu sem rual a tul thu te, zirna in engemawzat chu thawm that a pawimawh tawh thu te an thlen.

Mizo zirlaiten hma an sawn zel theih nan leh harsatna nei lova zirna an kalpui theihnan chak zawka hma lakpui turin MSU hruaitute chuan Chief Minister hi an ngen a ni.

MSU chuan Zirtirtu an awmna hmuna awm tha duhlote dapchhuah hna a thawk mek zel a, zirtirtu hetiang lo awm an awm chuan hremna dan anga an chunga lekkawh anih hma ngeia lo insiamrem turin MSU chuan a hraittir a. Mizo mipuite pawh mahni khua theuhah hetiang zirtirtu lo hria an awm anih chuan MSU General Headquarters hruaitute hnenah hrilhhre turin an ngen bawk.