ZALEN Nov. 14. 2024; Govt. Serchhip College a Associate Professor Dr. NB Sachhei chuan a pension hnu-ah pawh hlawh engmah nei loin zirtir hna a thawk chhunzawm.

Dr. NB Sachhei hian Government Serchhip College a Zoology department-ah Associate Professor hna a thawk thin a, kumin 2024, August 31 khan a hna atang hian a pension a ni.

A pension hnu hian an department (zoology) ah zirtirtu pahnih chauh an awm a, zirtirtu indaih lohna avanga zirlai te'n harsatna an tawk tur chu ngai ngam loin Dr. NB Sachhei hian a pension tuk atangin dan pangngaiin class a la chhun zawm zel a, thla thum chhung zet cheng khat mah hlawh loin College ah hian zirtirna hna a thawk chhunzawm a ni.

Dr. NB Sachhei hi pa invawng fel tak, che fel tak a ni a, smart takin a inchei a, nitin zing dar 9 ah College a thleng ziah thin. College a a thawh chhung zawng hian student profile felfai takin a vawng a, regular takin a class lak dan ziahna (log book) a maintain thlap a, kar tawpah Principal a sign tir ziah thin.

Dr. NB Sachhei hian Serchhip College a a thawh chhung hian Zoology department ah University rank holder 10 tal neih tumin tan a la hle a, Covid 19 vang khan a tum hi a ti hlawhtling thei ta lo a, University rank holder 7 lai a chher chhuak ta tho a ni.