Mizoram sawrkar chuan Middle School leh Primary School zirtirtu 946 lak thar tumin hma a la mek a, dan pangngai ang chuan he hna lak thar tur hi Mizoram Public Service Commission (MPSC) tih tur a ni a. Mahse sawrkar lam chuan zirna awmna khua mite ngei lak an nih theihnan tun dan dinglai awm mek chu hman loha, anmahni in lak mai an rawt a, hei hian sawizui a hlawhin eptu lam chuan party induhsakna thiltih a awm dawn nia ngaiin an duh loh thu an sawi nasa hle.

National Council for Teacher Education (NCTE) in zirtirtu lakna tura India ram puma zawm tur a siamah chuan zirtirtu ni tur hian Teacher Eligibility Test an paltlang ngei a ngai a. Hei mai bakah computer thiamna nei an ni tur a ni, tih a ni bawk a. Mahse heng thil tul pahnih hi sawrkar chuan ngaihhnathiam turin MPSC ah hian a dil a, MPSC lam pawhin sawrkar hi zawhna azawt let mek niin an sawi.

Zirna hi a pawimawh a, tu sawrkar pawh lo ding se a ngaih pawimawh zinga mi a ni zel a ni. Mizoramah hian state dang te ngaihtuah chuan sawrkar hnuaia thawk zirtirtu hi an tamin an indaih hle tura ngaih a ni a, mahse thingtlang lama awm an tlem avang hian harsatna a thleng a. Thingtlang lamah zirtirtu 2/3 lekin naupang engemaw zat an enkawl laiin khawpuiah erawh chuan zirtirtu 6/7 emaw lai ten zirlai tlem te an enkawl leh si a. Zirtirtu semrual hna thawk tur hian zirlai pawlte pawhin tum engemaw zat sawrkar hi an lo nawr tawh a, sawrkar pawhin hmalak han tum thin mah se, a harsa a ni ang e, tun hi kan thlen chin chu a la ni ta zel mai.

Zirtirtu ten thingtlang leh khaw danga awm an hreh chhan leh an chhuanlam pakhat nia lang chu quarter a awm lo hi a ni. He harsatna sutkian a nih a, a khua mite ngei thawktu atan hian lak an nih theihnan sawrkar chuan ruahmanna a siam niin a sawi a, sawrkar tan chhan hi a dik viau a ni. Hun kal tawh leh tuna kan hun tawn mek han en ila zirtirtu tha tak tak leh qualified  ngei te MPSC kaltlangin lak an ni tawh thin a, mahse mi tam tak chu an thawhna hmun turah kal duh lovin chhuanlam an siam a. Thenkhat hun reilote thawh hnua aikal la te an awm bawk a, transfer dil reng rengin Minister leh sawrkar hotute kan bawr a, sawrkar tan pawh hian a luhai thlak ve hle ang tih a rinawm. Dan angin MPSC hi chuan la se chuan induhsak bikna awm lovin a tling apiang a la dawn a, chu chu thil tha ber a ni.

Chuvangin tuna sawrkarin a khua mite ngei emaw khaw thenawm hnaia hetiang thawktu tling zirtirtu lak tumna a nei hi an thlirna atang chuan a awm hliah hliah a, hetiang hi lak an nih chuan transfer chungchanga buaina awm thin leh zirtirtu semrual chungchanga harsatna awm thin hi sutkian anih a beiseiawm. Hetih lai hian eptute hlauh anga party mite induhsakna atana hman a tum anih erawh chuan a nghawng chu tha lo tak a ni ang. Zirtirtute hi kan ram leh hnam siamtu, zirlaite entawn an nih avangin an pawimawh a, sawrkar pawh hian langtlang leh felfai takin a tling ngei te chauh hi la ngei teh se.