Aizawl: Gov’t. Hrangbana College Students’ Union chuan thuchhuah siamin sawrkarin zirtirtu a pek belh loh chuan lungawi loh lantir an tum tih an sawi.

Thuchhuah an siamah Gov’t. Hrangbana College-ah hian zirlai 2,234 awmin zirtirtu 68 an awm a, heng zinga zirtirtu paruk sawn chhuah tur a tih an ni a, post ruak hnawh khat turin zirtirtu pathum chiah rawn dah tura tih a ni.

Tun dinhmunah hian subject thenkhatah February thlaa professor superannuation pension tur pahnih an awm a, kuminah hian professor pension tur eng emaw zat an awm bawk tih an sawi a. Sawrkar hnuaia college zirlai tam berah hian class lak hleih theih loh khawpin professor an indaih lo tih sawi bawkin an mamawh zirtirtu hi a rang thei ang bera pe turin sawrkar an phut a. February 6, 2023 hmaa chhanna an hmu lo a nih chuan tiam chin awm lova lungawi loh lantir an tum tih an sawi bawk.