Covid 19 vangin Mizoram pumah thilpekin kan in tanpui tawn nasa hle a, hei hi thil lawmawm tak a ni a. Inpuih tawn hi kan sakhaw vawn leh hnam zia atang pawhin kan tih tur ni awm reng a ni. Chief Minister relief fund ah sum a lut renga, a chhungluttute thlalak te pawh tihdarh a ni a, khua ang te pawhin thlai thar te khawpui lamah a thlawnin pek tawp tawp a ni a, a lawmawm khawp mai. Ramri veng himtu kan pasaltha te eitur te lirthei hmangin pawl anga thawn chhuah a ni bawk a ni. Kan ram hriautute ngei pawhin Covid 19 do nan sum leh hmanrua an sema, Covid do tura kan mithiamte fehchhuak pawhin nasa mipui an zirtir bawk a ni. Hetiang tih duhna hi thahnemngaihna atanga chhuak a ni a, midang pawhin ti ve zel sela, inpuih tawn hi in zirtir zel pawh a tha khawp ang.

Thilpek in hlan laite thenkhatin thla an la thin a, dahthat atan an duh bakah midang tihmuh an duhna rilru vang a nih ngei a rinawm a, thenkhat chu mipui hriat tur chi te pawh a ni ang. Heng thlalak hi chanchinbu, TV leh social media lamah te nasa taka thehdarh a ni bawk a, tihawmreng pawh a ni. Hetih lai hian sawrkar chuan mitin 'mask' vuah tawh tur leh inhnaih lo turin zirtirna a pe mek a, a tlangpuiin heng thlalakah hian mask vuah leh physical distancing an zawm mang loa, hnaih tak takah an ding dul a, thlalak lo dawngsawngtu mipui rilruah engtin nge a tlak ang? tih lam kan ngaihtuah chian a ngai tih a lang a ni.

'Thlalak tha chuan thu sang khat a sawi' tih tawngkam a awm a, a sawi tum ber chu thlalak hian a hmutu/ thlirtu rilruah nasa takin hna a thawk tihna a ni a, kan hriat loh laiin a thlirtuteah nghawng a nei thei a, an rilru pawh a hruai thei tihna a ni bawk ang. Hemi a nih avang hian thil tha kan ti lai thlalak thehdarh te hi fimkhur ila, Covid 19 invenna kawngah a dawngsutu rilruah inthlahdahna a siam thei dawnin a lang tlat a, 'anni pawhin an zawm chuang lo' tih rilru pu te pawh an awm thei ang.

Duhthusamah chuan hetiang thehdarh leh tur chi thlalak hi chu kar inhlat taka awmin 'mask' vuahin emaw tlem pawtthla deuh pawhin emaw thla lak ni zel tawh se la, thlalaka kan leng dawn lo a nih pawhin hla tak atangin a lak theih veka, a nih loh pawhin mi pathum emaw pali chauh emaw thlalakah hian lang law law mai ila! A taka kan thil tih atang hian mipui an inzir dawn a ni tih hre thar leh ang u.