Mizoram Health & Family Welfare Department hnuaiah tunhnai khan Zoram Medical College (ZMC) atan staff nurse 50 hna lak tur atan interview result tihchhuah a ni a, a result ah hian ZMC a nurse volunteer a thawk te chu an lung a awi lo a, ni hnih khat chu an hna te pawh an chawl hial a. An lungawilohna hi Chief Minister hnenah pawh an thlen tawh a, pawl thenkhat pawhin nurse lak danah hian thil dik lo awm nia hriain awrawl an chhuah tawh bawk a ni.

He thu hi lak lap chi a ni lo a, thil diklo a tel nia sawi a nih takah ZMC hotu lam chu insawifah turin sawrkar lam chuan a ti bawk a ni awm e.  

Sawrkar hna lak hrim hrim a induhsakna diklo awm thin nia sawi a ni foa hna diltute ti hnual fotu a ni a,  a pawi khawp mai.  Sawrkar hna hi  mi tam takin an chan a ni a, kan ram rethei angah chuan a la hlu hle a. Hripui vanga volunteer tur a zawn lai khan  an vang deuh nge ni? volunteer tura inpe te chu  hna lak turah duhsak bik tur an nih thu telh a ni a. A thawk nghet zawkte tan pawh hri vei enkawla chakawm dawn loh tehreng nenvolunteer   100 vel bawrin an thawk thei a. Ramin a mamawh laia inpete hi an hluin an fakawm thlawt a ni.

Hna lakah chuan a thiam dan indawt (merit) a lak mai tur a ni a,  hetih lai hian nurse 50 hna lak tihchhuah an ni a, volunteer te zingah mi tlemte chauh an tlin leh tak si avangin nurse te an lungawi lo hi thil awm tak pawh a ni a, an thiam lohna a awm lem lo. 

A pawi ta ber zawk chu ZMC a nurse volunteer zawn a nih lai khan hna laka duh sak bik tur thu hi tarlan a lo ni tawh si a, hetah hian tam tak an innghat dawn a, tiam an nih anga thil a thleng leh ta si lo a. Hna latute’n thiam dan indawt (merit) in hna an la leh si niin a lang a. Sawrkar a thutiamah a ding lo nia hmuhna lian tak a awm pawh hi thil awm hliah hliah a ni.

Eng pawh nise tun tum ah hi chuan sawrkar chetdan a felfai loa, a thu a inkalh tih a lang a. Mi tam takin an tih theih loh hri vei enkawl tura inpe te a tiam tawh hi a hriat sak reng a tha khawp ang.