Aizawl April 11, 2023: Zoram Medical College-a MBBS zirlai hmasa ber (2018 batch) te result chu vawiin khan tihchhuah a ni a. Zirlai 95 zingah mi 68 ten hlawhtlinna changin, pass percentage 71% a ni a, Lalrempuii Hmar chu pakhatna a ni.

Zoram Medical College (ZMC) result chhuak chungchangah hian Health Minister Dr. R. Lalthangliana chuan thuchah siamin ZMC-in chanchin lawmawm tak a nei chu Mizoram tan mellung pawimawh tak a nih thu a sawi a. Sawrkar hmasain theihtawp chhuaha bul a lo tan tawhna ah lawmthu a sawi a, Medical College puitlin nan tun sawrkar pawhin theihtawp a chhuah a ni, a ti bawk.

Minister chuan, "Covid-19 hripui vanga harsatna Mizoram-in a hmachhawn karah Zoram Medical College chu Dedicated Covid Hospital-ah puan niin, hemi avang hian MBBS zirlaite pawhin harsatna tam tak an tawk," a ti. Harsatna tam tak kara hlawhtlinna chang zirlaite chu a lawmpui thu sawiin, hlawhtling ta lo te tan Mizoram University-in exam a buatsaih leh thuai tur thu a tarlang. 

MBBS zirchhuak thar ten Internship an tan thuai theih nan sawkarin hma a lak mek thu sawiin, "National Medical Council-te nen indawrna kalpui mek a ni," tiin, Nakkum lamah chuan doctor indaihlohna pawh engemaw chenah a phuhruk ngei a beisei thu a tarlang.

ZMC result kimchang en duh tan a hnuaia link ah hian en theih a ni. 

zmc.edu.in/post/result-of-3rd-mbbs-part-ii-uni-exam-2018-batch