ZALEN May 26, 2026 : Health and Family Welfare Minister Lalrinpuii chuan Zoram Medical College and Hospital (ZMC&H) a zirlai kumina MBBS zirchhuakte puala buatsaih “Graduation Day” a hmanpui a, Graduate thar te hnena he College-in lawmmawn a siam thin te chu Mizo zirlai vekin an dawng.

ZMC&H Graduate tharte hi batch thumna niin kum 2021 February atangin zirna bul an tan a, final exam pe zirlai 98 zinga 96 te chu graduate theiin pass percentage chu 97.95% a ni. Pakhatna - Alex Vanlalruatkima, pahnihna - C. Lalhmachhuani, leh pathumna - Zosangpuii te an ni. Zirna-a ti tha lawmman a pek baka Award a pek awmchhun, zirna piah lama activities hrang hranga titha te hnena a pek thin Colonel VL Ruata Award chu Paul Ngurthantluanga Vanchhawng hnenah hlan a ni a. Zirlaite aiawhin Alex Vanlalruatkima chuan thu a sawi.

ZMC&H a Graduation Day inkhawma khuallian Lalrinpuii chuan graduate tharte chu Covid-19 hunlaia zirna tan mah ni se, tha taka an pass theih avangin a lawmpui thu a sawi a, doctor indaihlohna pawh engemaw chen chu a phuhruk ngei a ring tih a sawi. Mizoram sawrkar chuan MBBS an zir theih nan theihpatawp a chhuah pui a, zirtirtu tha tak tak a rawih bakah fee pawh a tumsak a, chuvangin Mizoramin an thiamnate a mamawh hunah tlanchhe mai lova, bond (inremna) an ziah chu puitlin vek turin a chah a, zirlaite hian an zir zawh hnuah kum hnih (2) chhung Mizoram sawrkar hnuaia thawk turin inremna hi an zir hmain an ziak tawh tih a sawi.

Health Minister hian Graduation Day hun a hmanpui hma hian Mizorama a hmasa ber ni turin Interventional CT Scan a hawng a, Interventional CT Scan hawn ani thei chu lawmawm a tih thu a sawi. He hunah hian Adviser to CM (Finance) TBC Lalvenchhunga leh Higher and Technical Education Director Laltanpuia te pawh an tel a ni.

Dr Lily Chhakchhuak, Mizoram Health Systems Strengthening Project (MHSSP) a Project Director chuan Interventional CT Scan hawn thar a ni chu lawmawm a tih thu a sawi a, August ni 7, 2018-a ZMC&H din a nih atanga tun dinhmun a thleng thei chu a lawmthu a sawi a, nikum atangin Post-Graduate (PG) zirna tan a nih tawh thu sawiin, department panga (5)- Anaesthesiology, General Medicine, General Surgery, Obstetrics & Gynecology leh Pediatrics-ah seat pahnih theuh hawn ni tawhin zirlai pakua (9) an nei mek a, Master of Public Health (MPH) zir mek pariat (8) an awm bawk.

He programme ZMC&H Director Prof. Zoramthara Zadeng chuan a kaihhruai a, Prof. Swati M Patki, ZMC&H Dean chuan graduat tharte chu oath taking neih puiin, Prof. Benjamin Lalrinpuia, Organising Secretary chuan lawmthu sawiin hun a khar a ni.