ZALEN August 22, 2025 : Health Minister Lalrinpuii chuan vawiin khan Zoram Medical College & Hospital-in National Quality Assurance Standards (NQAS) Certified Hospital an nih lawmna inkhawm a hmanpui a, hemi rual hian MUHCS hnuaia thuam thar, Private Cabin leh ICU khum dah belh te hawnna a nei bawk. Aizawl South III bialtu Baryl Vanneihsangi Tlau, MLA chu Khualzahawm a ni.

India ram Damdawiin tha (Quality) bik, tehfung hautak leh endikna point chi hrang hrang points 5000 chuang hmanga endiktu mi thiam te'na an endik thin National Quality Assurance Standards (NQAS) Assessment chu ZMC&H chuan kumin March thla khan an hmachhawn a, mark 92.89% hmuin NQAS Certified Hospital-ah puan an ni.

Hospital pum anga he lawmman hi dawng an nih bakah Nau neihna lama hospital tha bik (LAQSHYA) Certificate pawh dawngin, Nau neihna Ward Labor Room chuan 92.88% a hmu a, nau neih zaina room, Maternity OT chuan 98.26% a hmu bawk. Naupang leh naute enkawlna kawngah Damdawiin tha bik tehna (MUSQAN) Certificate pawh dawngin 92.80% a hmu bawk a. ZMC&H chu endikna result-a a sang ber Platinum category ah a tling vek a ni.

MUCHS hnuaia Minister in ZMC&H-a a hawn tharte hi Private Cabin 30 niin, a hmaa awmsa Room 10 nen, tunah hian Private Cabin 40 ZMC&H-ah hian a awm ta a ni. ICU khum 13 dah thar chu a hawng tel bawk a, heng bakah hian ward hrang hrangah khum engemaw zat dah belh a ni bawk

NQAS lawmna Inkhawm ah hian Health Minister Lalrinpuii chuan, "Mizoram Sawrkar hnuaia Mizoram Health System Strengthening Project (MHSSP) leh World Bank tangkawp hmalakna chungchang sawiin, hemi project hnuaia hlawm lian tak pakhat, Internal Performance Agreement (IPA) hi sawrkar damdawiin te’n kum 5 chhungin kum 1-ah vawi 4, an thawh that dan azirin pawisa an dawn thin a. Hemi pawisa hmang hian sawrkar damdawiin ten quality lamah hmalakna hrang hrang an kal pui a, NQAS certification an neih theih nan IPA ngawrh taka kalpui a ni," a ti.

“National Quality Assessment Standards (NQAS), Ministry of Health and Family Welfare, India hnuaia MHSSP hmalaknaa Mizoram Damdawiin hrang hrang 42-in National Certification a dawng thei ta a, chung zinga ZMC&H-in a sang ber Platinum Category ah in han certify tel thei hi a ropui ka ti tak zet zet a ni" a ti.

Lalrinpuii chuan "Endikna hautak leh duhtui em em, hmanrua leh thawktu duh hnem leh duhtui em em karah, tling nimai lovin, a tehna-a a sang berah in han in hlang thei hi a lawmawm zual hle a ni," a ti bawk.

Health minister chuan Sawrkar hma laknaah MUHCS tan chhoh anih atangin ZMC&H chu damlo tam ber dawngsawngtu an nih angin sawrkar hmalakna tih puitlin a nih theihna kawng sul sutu pawimawh tak te zinga mi an nih avangin mimal tak pawha a lawm thu a sawi. ZMC&H-a Private Cabin, Ward leh ICU khum te, Department thar hawn belh te pawh mipui tan tangkai taka hman a nih zel theih nan te leh phai lam damdawiin hautak taka pan ngai lova, Quality Treatment an lo pek thin te chu a ropui in MUHCS tihlawhtlingtu ber pakhat anih thu a sawi a, chhawm nung zel turin thawktu zawng zawng te a fuih bawk a ni.

NQAS lawmna inkhawm ah hian Award chi hrang hrang- Director’s Award, Medical Superintendent's Award, Nursing Superentindent’s Award te sem niin, ZMC&H-a NQAS department ti tha zual 8, Labour Room, Maternity OT(Nau neih zai na), Paediatric OPD, Paediatric Ward, SNCU( Nausen ICU), Blood Bank, Casualty leh General Administration te hnenah hlan an ni. Heng bakah hian ZMC&H department thenkhat in lawmman hrang hrang an dawn te lawmpuina leh award hlanna hun hman a ni bawk.

Inkhawmah hian Dr. Evelyn Lalremsangi Hmar, IPA Secretary & Quality Team Advisor leh Lalbiaknguri, Assistant Director, Directorate of Nursing, Nursing Superintendent kal chhuak ta te'n thu an sawi bawk.